ನವದೆಹಲಿ : ಚೀನಾದ ಉಯಿಘುರ್ ಕ್ಯಾಂಪ್ ಗಳಲ್ಲಿ ಮುಸ್ಲಿಮರ ಮೇಲೆ ವ್ಯಾಪಕ ದೌರ್ಜನ್ಯಗಳಾಗುತ್ತಿರುವ ಬಗ್ಗೆ ಬಿಬಿಸಿ ವರದಿಯೊಂದು ತಿಳಿಸಿದೆ. ಉಯಿಘುರ್ ಮತ್ತು ಇತರ ಮುಸ್ಲಿಮರನ್ನು ವಶಕ್ಕೆ ತೆಗೆದುಕೊಂಡು, ‘ಪುನರ್ ಶಿಕ್ಷಣ ಶಿಬಿರಗಳಲ್ಲಿ ಇರಿಸಲಾಗಿದ್ದು, ಇಲ್ಲಿ ಭಯಾನಕ ದೌರ್ಜನ್ಯಗಳು ನಡೆದಿವೆ.
ಮಹಿಳೆಯರ ಮೇಲೆ ವ್ಯವಸ್ಥಿತ ಅತ್ಯಾಚಾರ, ಹಿಂಸೆ, ಕಿರುಕುಳಗಳನ್ನು ನೀಡಲಾಗುತ್ತಿದೆ. ಮಹಿಳೆಯರ ಬಗ್ಗೆ ಮಾತನಾಡುವವರನ್ನು ಮಾಸ್ಕ್ ಧರಿಸಿದ ವ್ಯಕ್ತಿಗಳು ಎತ್ತಿಕೊಂಡು ಹೋಗುತ್ತಾರೆ ಎನ್ನಲಾಗಿದೆ.
ಕ್ಸಿನ್ ಜಿಯಾಂಗ್ ನ ಉಯಿಘುರ್ ಮತ್ತು ಇತರ ಮುಸ್ಲಿಮರ ಶಿಬಿರಗಳಲ್ಲಿ ಮಹಿಳೆಯರ ವ್ಯವಸ್ಥಿತ ಅತ್ಯಾಚಾರ, ಲೈಂಗಿಕ ಕಿರುಕುಳದ ವರದಿಗಳಿಂದ ನಾವು ತುಂಬಾ ವಿಚಲಿತರಾಗಿದ್ದೇವೆ. ಈ ದೌರ್ಜನ್ಯಗಳು ಆಘಾತಕಾರಿಯಾದುದು ಮತ್ತು ಗಂಭಿರ ಪರಿಣಾಮಕಾರಿಯಾದುದು ಎಂದು ವರದಿಗಳ ಬಗ್ಗೆ ಪ್ರತಿಕ್ರಿಯಿಸಿರುವ ಅಮೆರಿಕ ವಿದೇಶಾಂಗ ಸಚಿವಾಲಯದ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಒಂದು ಖಾಸಗಿ ಅಂದಾಜಿನ ಪ್ರಕಾರ ಒಂದು ಮಿಲಿಯನ್ ಗಿಂತಲೂ ಹೆಚ್ಚು ಪುರುಷ, ಮಹಿಳೆಯರು ಈ ಶಿಬಿರಗಳಲ್ಲಿದ್ದಾರೆ. ಚೀನಾ ಮಾತ್ರ ಇವುಗಳನ್ನು ‘ಪುನರ್ ಶಿಕ್ಷಣ ಕೇಂದ್ರ’ಗಳು ಎನ್ನುತ್ತಿದೆ,
ಕುರ್ ಆನ್ ಹೊಂದಿದುದಕ್ಕೆ, ಹಂದಿ ಮಾಂಸ ತಿನ್ನದಿರುವುದಕ್ಕೂ ಕೆಲವರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಮಾನವ ಹಕ್ಕು ಹೋರಾಟಗಾರರು ಆಪಾದಿಸಿದ್ದಾರೆ. ಆದರೆ, ಚೀನಾ ಎಲ್ಲಾ ಆರೋಪಗಳನ್ನೂ ತಳ್ಳಿ ಹಾಕಿದೆ.
