ನವದೆಹಲಿ : ಕೇಂದ್ರ ಸರಕಾರದ ನೂತನ ಕೃಷಿ ನೀತಿಯನ್ನು ವಿರೋಧಿಸಿ ದೆಹಲಿಯಲ್ಲಿ ಪ್ರತಿಭಟನೆ ನಡೆಸುತ್ತಿರುವ ರೈತರು ತಮ್ಮ ಬೇಡಿಕೆ ಈಡೇರದಿದ್ದರೆ, ಜ.26ರಂದು ‘ಟ್ರಾಕ್ಟರ್ ಪರೇಡ್’ ನಡೆಸುವುದಾಗಿ ಕರೆ ನೀಡಿದ್ದರು. ಈ ಸಂಬಂಧ ಪ್ರತಿಭಟನಕಾರರನ್ನು ಬೆಂಬಲಿಸಲು ಹರ್ಯಾಣದ ಹಲವು ಮಹಿಳೆಯರೂ ಮುಂದಾಗಿದ್ದಾರೆ. ಇದೀಗ ಅವರು ಟ್ರಾಕ್ಟರ್ ಚಲಾಯಿಸಲು ತರಬೇತಿ ಪಡೆಯುತ್ತಿದ್ದು, ಜ.26ರಂದು ‘ಟ್ರಾಕ್ಟರ್ ಪರೇಡ್’ ಪ್ರತಿಭಟನೆ ನಡೆದರೆ, ಅದರಲ್ಲಿ ಸೇರಿಕೊಳ್ಳಲಿದ್ದಾರೆ ಎಂದು ವರದಿಯೊಂದು ತಿಳಿಸಿದೆ.
ರಾಜ್ಯಾದ್ಯಂತ ಹಲವು ಕಡೆ ಈ ರೀತಿ ತರಬೇತಿ ನೀಡಲಾಗುತ್ತಿದೆ. ಅದರಲ್ಲಿ ಸೋಮವಾರ ಜಿಂದ್-ಪಟಿಯಾಲ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಜಿಂದ್ ಜಿಲ್ಲೆಯ ಖಾತ್ಕರ್ ಟೋಲ್ ಪ್ಲಾಝಾದ ಸಮೀಪ ಇಂತಹುದೊಂದು ತರಬೇತಿ ನೀಡಲಾಗಿದೆ.
ಮಹಿಳೆಯರಿಗೆ ಟ್ರಾಕ್ಟರ್ ಸ್ಟಾರ್ಟ್ ಮಾಡುವುದು ಹೇಗೆ? ಚಲಾಯಿಸುವುದು ಹೇಗೆ? ಸ್ವಿಚ್ ಆಫ್ ಮಾಡುವುದು ಹೇಗೆ? ಸ್ಟೇರಿಂಗ್ ನಿರ್ವಹಿಸುವುದು ಹೇಗೆ? ಮುಂತಾದ ವಿಚಾರಗಳನ್ನು ಮಹಿಳೆಯರಿಗೆ ಕಲಿಸಿಕೊಡಲಾಗಿದೆ.
ಜ.26ರೊಳಗೆ ತಮ್ಮ ಬೇಡಿಕೆ ಈಡೇರದಿದ್ದರೆ, ರೈತರು ಟ್ರಾಕ್ಟರ್ ಗಳಲ್ಲಿ ದೆಹಲಿಯಲ್ಲಿ ಮೆರವಣಿಗೆ ನಡೆಸಲು ಉದ್ದೇಶಿಸಿದ್ದು, ಇದನ್ನು ‘ಟ್ರಾಕ್ಟರ್ ಪರೇಡ್’ ಎನ್ನಲಾಗಿದೆ.
