ನವದೆಹಲಿ: ಮಾಜಿ ಸಚಿವ ಪ್ರಕಾಶ್ ಜಾವಡೇಕರ್ ಅವರನ್ನು ರಾಜ್ಯ ಸಭೆಯ ಎಥಿಕ್ಸ್ ಸಮಿತಿಯ ಮತ್ತು ಬಿಜೆಪಿ ಸಂಸದ ಸಿ. ಎಂ. ರಮೇಶ್ ರನ್ನು ರಾಜ್ಯ ಸಭಾ ಹೌಸಿಂಗ್ ಸಮಿತಿಯ ಅಧ್ಯಕ್ಷರಾಗಿ ನೇಮಕ ಮಾಡಲಾಗಿದೆ.
ಉಪ ರಾಷ್ಟ್ರಪತಿಗಳೂ ಆಗಿರುವ ರಾಜ್ಯ ಸಭಾ ಚೇರ್ಮನ್ ಜಗದೀಪ್ ದನ್ಕರ್ ಅವರು ನಾನಾ ಸಮಿತಿಗಳನ್ನು ಮರು ರೂಪಿಸಿ ಅಧ್ಯಕ್ಷರ ನೇಮಕಾತಿ ಪಟ್ಟಿ ಬಿಡುಗಡೆ ಮಾಡಿದ್ದಾರೆ. ಮೇಲ್ಮನೆಯ ಸೆಕ್ರೆಟೇರಿಯೇಟ್ ಈ ಬಗ್ಗೆ ಸುತ್ತೋಲೆ ಹೊರಡಿಸಿದೆ.
ರಾಜ್ಯ ಸಭಾ ಮನವಿ ಸಮಿತಿ ಅಧ್ಯಕ್ಷರಾಗಿ ಬಿಜೆಡಿ ಸಂಸದ ಸುಜಿತ್ ಕುಮಾರ್, ಸರಕಾರಿ ಭರವಸೆಗಳ ಸಮಿತಿಯ ಅಧ್ಯಕ್ಷರಾಗಿ ಡಿಎಂಕೆಯ ಎಂ. ತಂಬಿದೊರೈ, ಸಂಸದೀಯ ಕಾಗದ ಪತ್ರಗಳ ಸಮಿತಿಯ ಅಧ್ಯಕ್ಷರಾಗಿ ಬಿಜೆಪಿ ಸಂಸದ ಕಾಮಾಕ್ಯ ಪ್ರಸಾದ್ ತಾಸಾ ನೇಮಕಗೊಂಡಿದ್ದಾರೆ.
ರಾಜ್ಯಸಭೆಯಲ್ಲಿ ಬಿಜೆಪಿಯ ಸಚೇತಕರಾಗಿರುವ ಲಕ್ಷ್ಮೀಕಾಂತ ಬಾಜಪಾಯಿಯವರು ಅಧೀನ ಶಾಸನ ಸಮಿತಿಯ ಅಧ್ಯಕ್ಷರಾಗಿದ್ದಾರೆ.
ಜಾವಡೇಕರ್ ಅವರು ಮರು ರೂಪಿಸಿದ ನೀತಿ ನಿರೂಪಣಾ (ಎಥಿಕ್ಸ್) ಸಮಿತಿಯ ಅಧ್ಯಕ್ಷರಾಗಿದ್ದಾರೆ. ಇದರ ಸದಸ್ಯರಾಗಿ ಟಿಎಂಸಿ ರಾಜ್ಯಸಭಾ ನಾಯಕ ಡೆರೆಕ್ ಓ ಬ್ರಿಯಾನ್, ಕಾಂಗ್ರೆಸ್ಸಿನ ಸಂಸದ ಜೈರಾಂ ರಮೇಶ್, ಬಿಜೆಡಿ ಸಂಸದ ಸಸ್ಮಿತ್ ಪಾತ್ರ, ವೈಎಸ್ ಆರ್ ಕಾಂಗ್ರೆಸ್ಸಿನ ವಿಜಯಸಾಯಿ ರೆಡ್ಡಿ ಇದ್ದಾರೆ.
