ನವದೆಹಲಿ: ದೇಶಾದ್ಯಂತ 11 ರಾಜ್ಯಗಳಲ್ಲಿ ಪಿಎಫ್ಐ ರಾಜ್ಯ ಮತ್ತು ಜಿಲ್ಲಾ ಮಟ್ಟದ ನಾಯಕರ ಕಚೇರಿಗಳು ಮತ್ತು ಮನೆಗಳ ಮೇಲೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ) ಮತ್ತು ಜಾರಿ ನಿರ್ದೇಶನಾಲಯ (ಇಡಿ) ನಡೆಸಿದ ವ್ಯಾಪಕ ದಾಳಿಯನ್ನು ಹಲವಾರು ಮುಸ್ಲಿಂ ಸಂಘಟನೆಗಳು ಗುರುವಾರ ಖಂಡಿಸಿವೆ.
ಪಿಎಫ್ಐನ ರಾಷ್ಟ್ರೀಯ ಮುಖ್ಯಸ್ಥ ಓಎಂಎ ಸಲಾಂ ಸೇರಿದಂತೆ ವ್ಯಾಪಕ ದಮನದ ಭಾಗವಾಗಿ ಕೇಂದ್ರ ಏಜೆನ್ಸಿಗಳು 100 ಕ್ಕೂ ಹೆಚ್ಚು ಉನ್ನತ ಅಧಿಕಾರಿಗಳನ್ನು ಬಂಧಿಸಿದ್ದು, ಭಾರತದ ವಿವಿಧ ಮುಸ್ಲಿಂ ಸಂಘಟನೆಗಳ ಒಕ್ಕೂಟವಾದ ಅಖಿಲ ಭಾರತ ಮುಸ್ಲಿಂ ಮಜ್ಲಿಸ್-ಎ-ಮುಶಾವರತ್ (ಎಐಎಂಎಂಎಂಎಂ) ಅಧ್ಯಕ್ಷ ನವೀದ್ ಹಮೀದ್, ಪಿಎಫ್ಐ ನಾಯಕರನ್ನು ಕಾಲ್ಪನಿಕ ಆರೋಪದ ಮೇಲೆ ಬಂಧಿಸಿರುವುದನ್ನು ತೀವ್ರವಾಗಿ ಖಂಡಿಸಿದ್ದಾರೆ.
ಈ ಬಗ್ಗೆ ಮಾತಾಡಿದ ಅವರು, ಪಿಎಫ್ಐ ಕಚೇರಿಗಳ ಮೇಲೆ ದೇಶವ್ಯಾಪಿ ದಾಳಿಗಳು ಮತ್ತು ಕಾಲ್ಪನಿಕ ಆರೋಪಗಳು ಮತ್ತು ಊಹೆಗಳ ಮೇಲೆ ಅದರ ನಾಯಕರನ್ನು ಬಂಧಿಸುವುದು ಅತ್ಯಂತ ಶೋಚನೀಯವಾಗಿದೆ. ನೈಜ ವಿಷಯಗಳಿಂದ ದೇಶದ ಗಮನವನ್ನು ಬೇರೆಡೆಗೆ ತಿರುಗಿಸುವ ಸರ್ಕಾರದ ಹತಾಶೆಯು ಈ ಮೂಲಕ ತೋರಿಕೆಯಾಗುತ್ತಿದೆ. ಸರ್ಕಾರದ ಈ ನಡೆಯನ್ನು ಎಲ್ಲರೂ ಒಕ್ಕೊರಲಿನಿಂದ ಖಂಡಿಸಬೇಕು. ಸಂಸ್ಥೆಗೆ ನ್ಯಾಯಾಲಯಗಳಿಂದ ನ್ಯಾಯ ಸಿಗುತ್ತದೆ ಎಂದು ಆಶಿಸುತ್ತೇನೆ ಎಂದು ನವೀದ್ ಹೇಳಿದರು.
ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ (ಪಿಎಫ್ಐ) ಸದಸ್ಯರ ಮೇಲೆ ರಾಷ್ಟ್ರವ್ಯಾಪಿ ದಬ್ಬಾಳಿಕೆ ನಡೆಸಿರುವುದು ಭಿನ್ನಮತವನ್ನು ಹತ್ತಿಕ್ಕಲು ತನಿಖಾ ಸಂಸ್ಥೆಗಳ ಅಧಿಕಾರವನ್ನು ಸರ್ಕಾರ ದುರುಪಯೋಗಪಡಿಸಿಕೊಳ್ಳುತ್ತಿರುವುದಕ್ಕೆ ಮತ್ತೊಂದು ಉದಾಹರಣೆಯಾಗಿದೆ ಎಂದು ಸ್ಟೂಡೆಂಟ್ಸ್ ಇಸ್ಲಾಮಿಕ್ ಆರ್ಗನೈಸೇಷನ್ ಹೇಳಿದೆ. ತಮ್ಮ ಸ್ವಾತಂತ್ರ್ಯದ ಬಗ್ಗೆ ಕಾಳಜಿ ವಹಿಸುವ ಎಲ್ಲಾ ನಾಗರಿಕರಿಗೆ ನಾವು ಇಂತಹ ಉದ್ದೇಶಪೂರ್ವಕ ಅಧಿಕಾರದ ದುರುಪಯೋಗದ ವಿರುದ್ಧ ಧ್ವನಿ ಎತ್ತುವಂತೆ ಮನವಿ ಮಾಡುತ್ತೇವೆ ಎಂದು ವಿನಂತಿಸಿದೆ.
