ಮಂಗಳೂರು: ಖ್ಯಾತ ಯಕ್ಷಗಾನ ಕಲಾವಿದ ವೇಣೂರು ವಾಮನ ಕುಮಾರ್  ಗುರುವಾರ ಬೆಳಗ್ಗಿನ ಜಾವ ಮೂಡುಬಿದಿರೆ ಗಂಟಾಲಕಟ್ಟೆ  ಸಮೀಪ ನಡೆದ ರಸ್ತೆ ಅಪಘಾತದಲ್ಲಿ ಸಾವನ್ನಪ್ಪಿದ್ದಾರೆ.

 ಅವರಿಗೆ  46 ವರ್ಷ ವಯಸ್ಸಾಗಿತ್ತು. ಬೆಳ್ತಂಗಡಿಯ ವೇಣೂರು ಗ್ರಾಮದ ಗೋಳಿತ್ಯಾರು ನಿವಾಸಿಯಾಗಿರುವ ವಾಮನ ಕುಮಾರ್ ಅವರು  ಕುಂದಾಪುರದ ಕೊಂಕಿ ಎಂಬಲ್ಲಿ ಯಕ್ಷಗಾನವನ್ನು ಮುಗಿಸಿ ರಾತ್ರಿ ಮನೆಗೆ ಬರುತ್ತಿದ್ದಾಗ ಈ ದುರಂತ ಸಂಭವಿಸಿದೆ.

ವಾಮನ್ ಅವರು ತೆಂಕುತಿಟ್ಟಿನ ಕಲಾವಿದರಾಗಿದ್ದು, ಸುಮಾರು 30 ವರ್ಷಗಳಿಂದ ಕಲಾ ಸೇವೆಯಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು. ಸ್ತ್ರೀ ವೇಷ, ಪುಂಡುವೇಷ ಧರಿಸಿ ಅವರು ಅಭಿನಯಿಸಿದ ಯಕ್ಷಗಾನ ಕಲಾಪ್ರೇಮಿಗಳ ಮೆಚ್ಚುಗೆಗೆ ಪಾತ್ರವಾಗಿತ್ತು.

ಪತ್ನಿ ಆಶಾ ವಾಮನಕುಮಾರ್, ಪುತ್ರಿ ವಂಶಿ, ಪುತ್ರ ಭುವನ್ ಹಾಗೂ ಅಪಾರ ಬಂಧುಬಳಗ, ಕಲಾಪ್ರೇಮಿಗಳನ್ನು ವಾಮನ ಕುಮಾರ್ ಅಗಲಿದ್ದಾರೆ.