ಪಂಜಾಬ್ | ಶಿರೋಮಣಿ ಅಕಾಲಿ ದಳ ಅಧ್ಯಕ್ಷ ಸುಖ್ ಬೀರ್ ಸಿಂಗ್ ಬಾದಲ್ ವಾಹನದ ಮೇಲೆ ಮಾರಣಾಂತಿಕ ದಾಳಿ; ಮೂವರಿಗೆ ಗುಂಡೇಟು

ನವದೆಹಲಿ : ಪಂಜಾಬ್ ನ ಜಲಾಲಾಬಾದ್ ಪ್ರದೇಶದಲ್ಲಿ ಶಿರೋಮಣಿ ಅಕಾಲಿ ದಳ (ಎಸ್ ಎಡಿ) ಅಧ್ಯಕ್ಷ ಸುಖ್ ಬೀರ್ ಸಿಂಗ್ ಬಾದಲ್ ಅವರ ವಾಹನದ ಮೇಲೆ ದಾಳಿ ನಡೆದಿದೆ.

ಹಲವು ಜನರು ಕಲ್ಲು ಮತ್ತು ಕೋಲುಗಳಿಂದ ಬಾದಲ್ ರ ವಾಹನದ ಮೇಲೆ ದಾಳಿ ನಡೆಸುತ್ತಿರುವ ದೃಶ್ಯವುಳ್ಳ ವೀಡಿಯೊವೊಂದನ್ನು ಎಎನ್ ಐ ಸುದ್ದಿ ಸಂಸ್ಥೆ ಟ್ವೀಟ್ ಮಾಡಿದೆ.

ದಾಳಿಯ ಹಿಂದೆ ಕಾಂಗ್ರೆಸ್ ಗೂಂಡಾಗಳಿದ್ದಾರೆ ಎಂದು ಶಿರೋಮಣಿ ಅಕಾಳಿ ದಳ ಆಪಾದಿಸಿದೆ ಎಂದು ವರದಿಯಾಗಿದೆ. ಮೂವರು ಎಸ್ ಎಡಿ ಕಾರ್ಯಕರ್ತರಿಗೆ ಗುಂಡಿನ ಏಟೂ ತಗುಲಿದೆ ಎನ್ನಲಾಗಿದೆ.

ಪೊಲೀಸ್ ಬೆಂಬಲಿತ ಕಾಂಗ್ರೆಸ್ ಗೂಂಡಾಗಳು ಎಸ್ ಎಡಿ ಅಧ್ಯಕ್ಷ ಸುಖ್ ಬೀರ್ ಸಿಂಗ್ ಬಾದಲ್ ಹತ್ಯೆಗೆ ಯತ್ನಿಸಿದ್ದಾರೆ. ಅಧ್ಯಕ್ಷರ ರಕ್ಷಣೆಗೆ ಮುಂದಾದ ಪಕ್ಷದ ಮೂವರು ಕಾರ್ಯಕರ್ತರಿಗೆ ಗುಂಡೇಟು ತಗುಲಿದೆ ಎಂದು ಎಸ್ ಎಡಿ ಹೇಳಿರುವುದಾಗಿ ವರದಿಯಾಗಿದೆ.

ಮುಂಬರುವ ಪಂಜಾಬ್ ಮುನ್ಸಿಪಲ್ ಚುನಾವಣೆಗೆ ತಮ್ಮ ಪಕ್ಷದ ಅಭ್ಯರ್ಥಿಗಳ ನಾಮಪತ್ರ ಸಲ್ಲಿಕೆಗಾಗಿ ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿದ್ದ ವೇಳೆ ಸುಖ್ ಬೀರ್ ಸಿಂಗ್ ಬಾದಲ್ ರ ಕಾರಿನ ಮೇಲೆ ದಾಳಿ ನಡೆದಿದೆ.