ಮಂಗಳೂರು: ನಗರದ ಸ್ಟೇಟ್ ಬ್ಯಾಂಕ್ ನಿಂದ ಬೋಂದೆಲ್ ಗೆ ಸಂಚಾರಿಸುವ ರೂಟ್ ನಂಬರ್ 19 ರ ಬಸ್ಸಿನ ನಿರ್ವಾಹಕನೊಬ್ಬ ಬಸ್ಸಿನಲ್ಲಿ ಪ್ರಯಾಣಿಸುತ್ತಿದ್ದ ಬಾಲಕಿಯೋರ್ವಳಿಗೆ ಮೊಬೈಲ್ ನಂಬರ್ ನೀಡಿ ಧರ್ಮದೇಟು ತಿಂದಿರುವ ಘಟನೆ ನಡೆದಿದೆ.
8ನೇ ತರಗತಿ ಓದುತ್ತಿರುವ ಬಾಲಕಿ ಪ್ರಯಾಣಿಸಿದ ಮೊದಲ ದಿನದಂದು ಕಂಡೆಕ್ಟರ್ ತನ್ನ ಮೊಬೈಲ್ ನಂಬರ್ ನೀಡಿದ್ದಾನೆ. ಈ ವಿಚಾರ ಬಾಲಕಿ ಮನೆಯಲ್ಲಿ ತಿಳಿಸಿದ್ದು, ಆಕ್ರೋಶಗೊಂಡ ಬಾಲಕಿಯ ತಾಯಿ ಬಸ್ಸನ್ನು ಬೋಂದೆಲ್ ಬಳಿ ನಿಲ್ಲಿಸಿ ಕಂಡೆಕ್ಟರ್ ಅನ್ನು ಕೆಳಗಿಳಿಸಿ ಹಿಗ್ಗಾ ಮುಗ್ಗಾ ಥಳಿಸಿರುವ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಬಾಲಕಿಯ ತಾಯಿಯೊಂದಿಗೆ ಸೇರಿ ಸಾರ್ವಜನಿಕರೂ ನಿರ್ವಾಹಕನಿಗೆ ಧರ್ಮದೇಟು ನೀಡಿದ್ದಾರೆ.
ಇಂದು ನನ್ನ ಮಗಳು ಮೊದಲ ಬಾರಿಗೆ ಬಂದಿದ್ದಾಳೆ, ದಿನವಿಡೀ ಇದರಲ್ಲಿ ಎಷ್ಟು ಹೆಣ್ಣು ಮಕ್ಕಳು ಬರುತ್ತಾರೆ, ಅವರಲ್ಲಿ ಎಷ್ಟು ಜನರಿಗೆ ನಂಬರ್ ನೀಡಿದ್ದೀಯಾ ಎಂದು ತುಳುವಿನಲ್ಲಿ ಪ್ರಶ್ನಿಸಿ ಬಾಲಕಿಯ ತಾಯಿ ನಿರ್ವಾಹನಿಗೆ ಕಪಾಳಮೋಕ್ಷ ಮಾಡಿ ಹಲ್ಲೆಗೈದಿರುವ ದೃಶ್ಯ ವೀಡಿಯೋದಲ್ಲಿ ಸೆರೆಯಾಗಿದೆ.
