ಪಶ್ಚಿಮ ದಂಡೆ: ಇಸ್ರೇಲ್ ಸೈನ್ಯವು ಮೇ ತಿಂಗಳಲ್ಲಿ ವಾಯುದಾಳಿ ನಡೆಸಿ ಗಾಝಾ ಪಟ್ಟಿಯ ನಾಲ್ಕು ಕಟ್ಟಡವನ್ನು ನೆಲಸಮಗೊಳಿಸುವ ಮೂಲಕ ಅಂತಾರಾಷ್ಟ್ರೀಯ ಯುದ್ಧ ನಿಯಮವನ್ನು ಉಲ್ಲಂಘಿಸಿದೆಯೆಂದು ಪ್ರಮುಖ ಅಂತಾರಾಷ್ಟ್ರೀಯ ಮಾನವ ಹಕ್ಕಗಳ ಒಕ್ಕೂಟ ಸೋಮವಾರ ಕಳವಳ ವ್ಯಕ್ತಪಡಿಸಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಹ್ಯೂಮನ್ ರೈಟ್ಸ್ ವಾಚ್ (ಎಚ್.ಆರ್.ಡಬ್ಲ್ಯೂ) ಈ ದಾಳಿಯಿಂದ ಯಾರಿಗೂ ಹಾನಿಯಾಗಿಲ್ಲ. ದಾಳಿಯಿಂದಾಗಿ ನೆರೆಯ ಕಟ್ಟಡಗಳು ಹಾನಿಗೊಳಗಾಗಿವೆ. ಮಾತ್ರವಲ್ಲದೆ ಡಝನ್ ಗಟ್ಟಲೆ ಜನರು ನಿರಾಶ್ರಿತರಾಗಿದ್ದಾರೆ ಮತ್ತು ತಮ್ಮ ವ್ಯಾಪಾರ – ವಹಿವಾಟನ್ನು ಕಳೆದುಕೊಂಡಿದ್ದಾರೆಂದು ಹೇಳಿದೆ. ಈ ದಾಳಿಯನ್ನು ಸಮರ್ಥಿಸುವ ಅಂಶಗಳನ್ನು ಇಸ್ರೇಲ್ ಬಹಿರಂಗಪಡಿಸಬೇಕೆಂದು ಎಚ್.ಆರ್.ಡಬ್ಲ್ಯೂ ಕೋರಿದೆ.
ಅಲ್-ಅಕ್ಸಾ ಮಸೀದಿ ಕಾಂಪೌಂಡ್ ಹಾಗೂ ಶೇಖ್ ಜರ್ರಾಹ್ ನಿಂದ ಇಸ್ರೇಲ್ ತನ್ನ ಪಡೆಗಳನ್ನು ಹಿಂದೆಗೆದುಕೊಳ್ಳುವಂತೆ ಹಮಾಸ್ ನೀಡಿದ ಗಡುವನ್ನು ಮೀರಿ ಇಸ್ರೇಲ್ ರಾಕೆಟ್ ಗಳನ್ನು ಹಾರಿಸಲಾಗಿತ್ತು. ಇಸ್ರೇಲ್ ನಡೆಸಿದ ಭೀಕರ ರಾಕೆಟ್ ದಾಳಿಯಿಂದಾಗಿ ಸಾಕಷ್ಟು ನಾಶನಷ್ಟವಾಗಿದೆ.
ಒಟ್ಟಾರೆಯಾಗಿ ವಿಶ್ವಸಂಸ್ಥೆಯ ಅಂಕಿಅಂಶಗಳ ಪ್ರಕಾರ ಕಳೆದ ಮೇ ತಿಂಗಳು ಗಾಝಾದ ಮೇಲೆ ದಾಳಿಯಲ್ಲಿ ಸುಮಾರು 260 ಜನರು ಸಾವನ್ನಪ್ಪಿದ್ದಾರೆ. ಇದರಲ್ಲಿ ಕನಿಷ್ಠ 66 ಮಕ್ಕಳು ಮತ್ತು 41 ಮಹಿಳೆಯರು ಸೇರಿದ್ದಾರೆ. ಹಮಾಸ್ ತನ್ನ 80 ಹೋರಾಟಗಾರರ ಸಾವನ್ನು ಒಪ್ಪಿಕೊಂಡಿದೆ. ಈ ದಾಳಿಯಲ್ಲಿ ಒಬ್ಬ ಸೈನಿಕ, 2 ಮಕ್ಕಳು ಸೇರಿದಂತೆ 12 ಇಸ್ರೇಲ್ ನಾಗರಿಕರು ಸಾವನ್ನಪ್ಪಿದ್ದಾರೆಂದು ಹೇಳಲಾಗಿದೆ.
