ಹಾರ್ದೋಯಿ: ಪತಿಯೊಬ್ಬ ಬ್ಯೂಟಿ ಪಾರ್ಲರ್‌ ನಲ್ಲಿ ತನ್ನ ಹೆಂಡತಿಯ ಜಡೆಯನ್ನು ಕತ್ತರಿಸಿರುವ ಘಟನೆ ಉತ್ತರ ಪ್ರದೇಶದ ಹಾರ್ದೋಯಿ ಜಿಲ್ಲೆಯಲ್ಲಿ ನಡೆದಿದೆ.
ಹಾರ್ದೋಯಿ ಜಿಲ್ಲೆಯ ಸಂದಿ ಪಟ್ಟಣದ ಮೊಹಲ್ಲಾ ಸಾರಮುಲ್ಲಗಂಜ್‌ ನಲ್ಲಿ ಈ ಘಟನೆ ಇತ್ತೀಚೆಗೆ ನಡೆದಿದೆ.
ಸಂತ್ರಸ್ತೆಯ ತಂದೆ ರಾಧಾಕೃಷ್ಣ ಎನ್ನುವರು ಈ ಕುರಿತು ಪೊಲೀಸರಿಗೆ ದೂರು ನೀಡಿದಾಗ ಘಟನೆ ನಡೆದಿರುವುದು ಬೆಳಕಿಗೆ ಬಂದಿದೆ.
ಆರೋಪಿ ರಾಮ್‌ ಪ್ರತಾಪ್ ತನ್ನ ಮಗಳಿಗೆ ವರದಕ್ಷಿಣೆ ಕಿರುಕುಳ ನೀಡುತ್ತಿದ್ದ. ಅಲ್ಲದೇ ಅವಳಿಗೆ ನಿರಂತರ ತೊಂದರೆ ಕೊಡುತ್ತಿದ್ದ. ಇತ್ತೀಚೆಗೆ ಮಗಳು ‘ಐ ಬ್ರೊ’ ಮಾಡಿಸಿಕೊಳ್ಳಲು ಬ್ಯೂಟಿ ಪಾರ್ಲರ್‌ ಗೆ ಹೋಗಿದ್ದಾಗ ಕೋಪಗೊಂಡು ಅವಳ ಜಡೆಯನ್ನು ಕತ್ತರಿಸಿ ಹಾಕಿದ್ದಾನೆ’ ಎಂದು ಸಂತ್ರಸ್ತೆಯ ತಂದೆ ರಾಧಾಕೃಷ್ಣ ದೂರಿದ್ದಾರೆ.
‘ಪ್ರಕರಣ ದಾಖಲಿಸಿಕೊಂಡಿದ್ದು ತನಿಖೆ ನಡೆಯುತ್ತಿದೆ. ಆರೋಪಿ ರಾಮ್‌ ಪ್ರತಾಪ್ ವರದಕ್ಷಿಣೆಗೆ ಜಡೆ ಕತ್ತರಿಸಿಲ್ಲ. ಹೆಂಡತಿ ಬ್ಯೂಟಿ ಪಾರ್ಲರ್‌ ಗೆ ಹೋಗುವುದನ್ನು ಸಹಿಸದೇ ಅವಮಾನಕಾರಿ ಕೃತ್ಯ ಎಸಗಿದ್ದಾನೆ’ ಎಂದು ಸಂದಿ ಪಟ್ಟಣದ ಪೊಲೀಸ್ ಠಾಣೆಯ ಮುಖ್ಯಾಧಿಕಾರಿ ರವಿ ಪ್ರಕಾಶ್ ತಿಳಿಸಿದ್ದಾರೆ.
