ಬೆಂಗಳೂರು: ಶಿವಮೊಗ್ಗದಲ್ಲಿ ನಡೆದ ಬಜರಂಗದಳ ಕಾರ್ಯಕರ್ತ ಹರ್ಷ ಎಂಬಾತನ ಹತ್ಯೆಗೆ ಸಂಬಂಧಿಸಿದಂತೆ ಐವರು ಆರೋಪಿಗಳನ್ನು ಹೆಚ್ಚಿನ ತನಿಖೆಗಾಗಿ ವಿಶೇಷ ನ್ಯಾಯಾಲಯವು, ಎನ್.ಐ.ಎ ಪೊಲೀಸರ ಕಸ್ಟಡಿಗೆ ಒಪ್ಪಿಸಿದೆ.
ಎನ್.ಐ.ಐ ವಕೀಲರು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ವಿಶೇಷ ನ್ಯಾಯಾಲಯದ ನ್ಯಾಯಮೂರ್ತಿ ಬಿ ಜಿ ಪ್ರಮೋದ್ ಅವರು ಆರೋಪಿಗಳನ್ನು ಎನ್.ಐ.ಎ ಕಸ್ಟಡಿಗೆ ಆದೇಶ ನೀಡಿದ್ದಾರೆ.
ಈ ಆದೇಶದನ್ವಯ ಪ್ರಕರಣದ ಆರೋಪಿಗಳಾದ ಶಿವಮೊಗ್ಗ ಟ್ಯಾಂಕ್ ಮೊಹಲ್ಲಾದ ಅಬ್ದುಲ್ ಅಫ್ವಾನ್, ವಾದಿ ಎ ಹುದಾ ನಿವಾಸಿ ಅಬ್ದುಲ್ ಖಾದರ್ ಜಿಲಾನಿ, ಇಲ್ಯಾಸ್ ನಗರದ ನಿವಾಸಿ ಫರಾಝ್ ಪಾಷಾ, ಜೆಪಿ ನಗರದ ಸೈಯ್ಯದ್ ನದೀಮ್ ಮತ್ತು ವಾದಿ ಎ ಹುದಾ ನಿವಾಸಿ ಜಾಫರ್ ಸಾದಿಕ್ ಎಂಬವರನ್ನು ಮೇ 9 ರವರೆಗೆ ಎನ್.ಐ.ಎ ಕಸ್ಟಡಿಗೆ ಒಪ್ಪಿಸುವಂತೆ ಆದೇಶ ನೀಡಲಾಗಿದೆ.
ಫೆಬ್ರವರಿ 20 2022 ರ ರಾತ್ರಿ ಶಿವಮೊಗ್ಗದಲ್ಲಿ ಬಜರಂಗದಳದ ಮುಖಂಡ ಹರ್ಷ ಎಂಬಾತನನ್ನು ಕಡಿದು ಹತ್ಯೆ ನಡೆಸಲಾಗಿತ್ತು. ಈ ಪ್ರಕರಣವನ್ನು ಸರ್ಕಾರ ಎನ್.ಐ.ಎ ತನಿಖೆ ವಹಿಸಿದ್ದು, ಇದುವರೆಗೂ ಹತ್ತು ಮಂದಿಯನ್ನು ಬಂಧಿಸಿ, ವಿಚಾರಣೆ ನಡೆಸಲಾಗುತ್ತಿದೆ.
