ಹೊಸದಿಲ್ಲಿ: ಫೇಸ್ ಬುಕ್ , ವಾಟ್ಸಾಪ್ ಹಾಗೂ ಇನ್ಸ್ಟಾಗ್ರಾಂ ಸೇವೆಯಲ್ಲಿ ವ್ಯತ್ಯಯವಾದ ದಿನದಂದು ಟೆಲಿಗ್ರಾಂಗೆ ಬರೋಬ್ಬರಿ 70 ಮಿಲಿಯನ್ ಹೊಸ ಬಳಕೆದಾರರು ಸೇರ್ಪಡೆಯಾಗಿದ್ದಾರೆ.
ಫೇಸ್ ಬುಕ್, ವಾಟ್ಸಾಪ್ ಹಾಗೂ ಇನ್ಸ್ಟಾಗ್ರಾಂ ಸೇವೆಗಳಲ್ಲಿ 6 ಗಂಟೆಗಳ ಕಾಲ ವ್ಯತ್ಯಯ ಕಂಡು ಬಂದ ಹಿನ್ನೆಲೆಯಲ್ಲಿ ಟೆಲಿಗ್ರಾಂಗೆ 70 ಮಿಲಿಯನ್ ಹೊಸ ಬಳಕೆದಾರರ ಸೇರ್ಪಡೆಯಾಗಿದೆ ಎಂದು ಟೆಲಿಗ್ರಾಂ ಸ್ಥಾಪಕ ಪಾವೆಲ್ ಡುರೊವ್ ಹೇಳಿದ್ದಾರೆ. ನಾವು ಒಂದೇ ದಿನದಲ್ಲಿ 70 ಮಿಲಿಯನ್ ಇತರೆ ಸಾಮಾಜಿಕ ಜಾಲತಾಣಗಳ ಬಳಕೆದಾರರನ್ನು ಸ್ವಾಗತಿಸಿದ್ದೇವೆ ಎಂದು ಅವರು ತಮ್ಮ ಟೆಲಿಗ್ರಾಂ ಚಾನೆಲ್ನಲ್ಲಿ ತಿಳಿಸಿದ್ದಾರೆ.
ಬಳಕೆದಾರರ ಸಂಖ್ಯೆಯಲ್ಲಿ ಗಣನೀಯ ಪ್ರಮಾಣದಲ್ಲಿ ಏರಿಕೆ ಕಂಡು ಬಂದ ಬಳಿಕವೂ ನಮ್ಮ ತಂಡ ಯಾವುದೇ ದೋಷವಿಲ್ಲದೇ ಕಾರ್ಯ ನಿರ್ವಹಿಸಿದೆ. ಈ ಮೂಲಕ ಈ ಅಭೂತಪೂರ್ವ ಬೆಳವಣಿಗೆಯನ್ನು ಸ್ವಾಗತಿಸಿದೆ. ಪ್ರಪಂಚದ ವಿವಿಧ ಭಾಗಗಳಿಂದ ಮಿಲಿಯನ್ಗಟ್ಟಲೇ ಬಳಕೆದಾರರು ಏಕಕಾಲದಲ್ಲಿ ಟೆಲಿಗ್ರಾಂಗೆ ಸೈನಪ್ ಆಗಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.
