►ಸಂಸದರಿಗೆ ಏನೆಲ್ಲ ಭತ್ಯೆಗಳು ಸಿಗುತ್ತೆ?
ಕಳೆದ ವಾರ ಮುಕ್ತಾಯಗೊಂಡ ರಾಜ್ಯ ವಿಧಾನಸಭಾ ಬಜೆಟ್ ಅಧಿವೇಶನದಲ್ಲಿ ರಾಜ್ಯ ಕಾಂಗ್ರೆಸ್ ಸರ್ಕಾರ ಶಾಸಕರ ವೇತನ ಹೆಚ್ಚಳ ಮಾಡಿದ್ದು ಭಾರೀ ಸುದ್ದಿಯಾಗಿತ್ತು. ಜನರ ತೆರಿಗೆ ಹಣದಲ್ಲಿ ಜನಪ್ರತಿನಿಧಿಗಳು ಮೋಜು ಮಸ್ತಿ ಮಾಡ್ತಾ ಇದ್ದಾರೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಕೆಲವರು ಮಾತಾಡಿದ್ದರು. ಇದೀಗ ಬಿಜೆಪಿ ನೇತೃತ್ವದ ಕೇಂದ್ರ ಸರ್ಕಾರ ಕೂಡ ಸಂಸತ್ ಸದಸ್ಯರ ವೇತನ ಹೆಚ್ಚಳ ಮಾಡಿ ಆದೇಶ ಹೊರಡಿಸಿದೆ.
ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಸಂಸತ್ ಸದಸ್ಯರ ವೇತನವನ್ನು 24% ಹೆಚ್ಚಿಸಿದ್ದು, ಹೊಸ ವೇತನವು ಎರಡು ವರ್ಷಗಳ ಹಿಂದೆ ಅಂದರೆ, ಏಪ್ರಿಲ್ 1, 2023 ರಿಂದಲೇ ಜಾರಿಗೆ ಬರುವಂತೆ ಅಧಿಸೂಚನೆ ಹೊರಡಿಸಲಾಗಿದೆ. ಇದರೊಂದಿಗೆ, ಕೆಲವು ಭತ್ಯೆಗಳು ಮತ್ತು ಸೌಲಭ್ಯಗಳನ್ನು ಹೊರತುಪಡಿಸಿ ಸಂಸದರ ಮಾಸಿಕ ವೇತನವು ಬರೋಬ್ಬರಿ 1.24 ಲಕ್ಷ ರೂ.ಗಳಿಗೆ ಏರಿಕೆಯಾಗಿದೆ.
ಈ ಅಧಿಸೂಚನೆಯ ಪ್ರಕಾರ ಹಾಲಿ ಸಂಸದರ ದಿನಭತ್ಯೆಯನ್ನು 2,000 ರೂಪಾಯಿಗಳಿಂದ 2,500 ರೂಪಾಯಿಗಳಿಗೆ ಹೆಚ್ಚಿಸಲಾಗಿದೆ. ಮಾಜಿ ಸಂಸದರು ಈಗ ತಿಂಗಳಿಗೆ 31,000 ರೂಪಾಯಿ ಪಿಂಚಣಿ ಪಡೆಯಲಿದ್ದು, ಈ ಹಿಂದೆ 25,000 ರೂಪಾಯಿ ಪಡೆಯುತ್ತಿದ್ದರು. ಇದರ ಜೊತೆಗೆ ಹೆಚ್ಚುವರಿಯಾಗಿ ಐದು ವರ್ಷಗಳನ್ನು ಮೀರಿ ಪ್ರತಿ ವರ್ಷ ಸೇವೆ ಸಲ್ಲಿಸಿದವರಿಗೆ ನೀಡಲಾಗುವ ಹೆಚ್ಚುವರಿ ಪಿಂಚಣಿಯನ್ನು ಕೂಡ ತಿಂಗಳಿಗೆ 2,000 ರೂಪಾಯಿಯಿಂದ 2,500 ರೂಪಾಯಿಗೆ ಹೆಚ್ಚಿಸಲಾಗಿದೆ.
ಸಂಸದರ ವೇತನ, ಭತ್ಯೆ ಮತ್ತು ಪಿಂಚಣಿ ಕಾಯ್ದೆಯಡಿ ಈ ಪರಿಷ್ಕರಣೆ ಮಾಡಲಾಗಿದೆ. ಇದು 1961ರ ಆದಾಯ ತೆರಿಗೆ ಕಾಯ್ದೆಯಲ್ಲಿ ನಿರ್ದಿಷ್ಟಪಡಿಸಿದ ವೆಚ್ಚ ಹಣದುಬ್ಬರ ಸೂಚ್ಯಂಕವನ್ನು ಆಧರಿಸಿದ್ದು, 2018ರ ಬಳಿಕ ಸಂಸದರ ವೇತನ ಮತ್ತು ಭತ್ಯೆಗಳಲ್ಲಿ ಇದು ಮೊದಲ ಪರಿಷ್ಕರಣೆಯಾಗಿದೆ.
ಸಂಸದರಿಗೆ ಏನೆಲ್ಲ ಭತ್ಯೆಗಳು ಸಿಗುತ್ತೆ?
2018ರಲ್ಲಿ ಕೊನೆಯ ಬಾರಿ ಸಂಸದರ ವೇತನ ಹಾಗೂ ಇನ್ನಿತರ ಭತ್ಯೆಗಳನ್ನು ಪರಿಷ್ಕರಿಸಲಾಗಿತ್ತು. ಆಗ ಸಂಸದರ ಮೂಲ ವೇತನವನ್ನು ತಿಂಗಳಿಗೆ 1 ಲಕ್ಷ ರೂಪಾಯಿ ಎಂದು ನಿಗದಿಪಡಿಸಲಾಗಿತ್ತು. ಇದರ ಜೊತೆಗೆ ಕಚೇರಿ ವೆಚ್ಚಗಳು ಮತ್ತು ಮತದಾರರೊಂದಿಗೆ ಸಂವಹನ ಸೇರಿ ಇತರೆ ಉದ್ದೇಶಗಳ ಖರ್ಚಿಗೆ 70,000 ರೂಪಾಯಿ ಕ್ಷೇತ್ರ ಭತ್ಯೆಯನ್ನು ಕೂಡ ನೀಡಲಾಗುತ್ತಿತ್ತು.
ಅಲ್ಲದೆ, ಸಂಸದರು ಫೋನ್ ಮತ್ತು ಇಂಟರ್ನೆಟ್ ಬಳಕೆಗೆ ವಾರ್ಷಿಕ ಭತ್ಯೆ, ತಮಗೆ ಮತ್ತು ಅವರ ಕುಟುಂಬಗಳಿಗೆ ವರ್ಷಕ್ಕೆ 34 ಉಚಿತ ದೇಶೀಯ ವಿಮಾನಗಳು, ಅನ್‌ಲಿಮಿಟೆಡ್‌ ಫಸ್ಟ್‌ ಕ್ಲಾಸ್‌ ರೈಲು ಪ್ರಯಾಣ ಮತ್ತು ರಸ್ತೆ ಪ್ರಯಾಣಕ್ಕಾಗಿ ಮೈಲೇಜ್ ಭತ್ಯೆ ಮುಂತಾದ ಹೆಚ್ಚುವರಿ ಸವಲತ್ತುಗಳನ್ನು ಸಹ ಸಂಸದರು ಪಡೆಯುತ್ತಾರೆ. ಸುಮಾರು 50,000 ಯೂನಿಟ್ ಉಚಿತ ವಿದ್ಯುತ್, ವಾರ್ಷಿಕವಾಗಿ 4,000 ಕಿಲೋಲೀಟರ್ ನೀರು, ನವದೆಹಲಿಯಲ್ಲಿ ಸರ್ಕಾರದಿಂದ ಒದಗಿಸಲಾದ ವಸತಿಯನ್ನು ಪಡೆಯುತ್ತಾರೆ. ಒಂದು ವೇಳೆ ಕೇಂದ್ರ ಸರ್ಕಾರದ ಅಧಿಕೃತ ವಸತಿಗಳಿಂದ ಹೊರಗುಳಿಯುವವರು ವಸತಿ ಭತ್ಯೆಯನ್ನು ಕೂಡ ಪಡೆಯಬಹುದು.
