ಬೆಂಗಳೂರು: ಚಾಮರಾಜಪೇಟೆ ಶಾಸಕರು ಮತ್ತು ಮಾಜಿ ಸಚಿವ ಬಿ ಜೆಡ್ ಜಮೀರ್ ಅಹ್ಮದ್ ಖಾನ್ ಇಂದು, ನಿರ್ದೇಶಕ ನಟರಾಜ್ ಅವರ ನಿರ್ದೇಶನದ ನಾಯಕ ನಟ ರಾಮ್ ಚೇತನ್, ನಾಯಕಿ ಮಯೂರಿ, ಸಹ ಕಲಾವಿದರಾದ ರಂಗಾಯಣ ರಘು, ಸುಚೇಂದ್ರ ಪ್ರಸಾದರಂತಹ ಅದ್ಭುತ ತಾರಾ ಬಳಗವನ್ನೊಳಗೊಂಡ “ವ್ಹೀಲ್ ಚೇರ್ ರೋಮಿಯೋ” ಚಲನಚಿತ್ರವನ್ನು ವೀಕ್ಷಿಸಿದರು.
ನಗರದ ವೀರೇಶ್ ಚಿತ್ರಮಂದಿರದಲ್ಲಿ ಚಿತ್ರದ ನಾಯಕ ರಾಮ್ ಚೇತನ್ ಮತ್ತು ಧಾರ್ಮಿಕ ಗುರುಗಳ ಜೊತೆ ಕುಳಿತು, ಚಿತ್ರವನ್ನು ವೀಕ್ಷಿಸಿದ ಅವರು, ಇದೊಂದು ಅದ್ಭುತ ಸಂದೇಶವುಳ್ಳ ಚಿತ್ರವಾಗಿದೆ. ನಾಯಕ ರಾಮ್ ಚೇತನ್ ಅವರ ಚೊಚ್ಚಲ ಅಭಿನಯದ ಚಿತ್ರವಾಗಿದ್ದರೂ, ಅವರ ನಟನೆ ನೋಡಿದವರಿಗೆ ಹೊಸಬರು ಅನ್ನಿಸದಿರುವಷ್ಟು ಮನೋಜ್ಞವಾಗಿ ನಟಿಸಿದ್ದಾರೆ. ಇಂತಹ ಚಿತ್ರಗಳನ್ನು ನಾವು ಹೆಚ್ಚು ಹೆಚ್ಚು ಪ್ರೋತ್ಸಾಹಿಸಬೇಕು ಎಂದು ಅಭಿಪ್ರಾಯ ಪಟ್ಟರು.
ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಚಿತ್ರದ ನಾಯಕ ರಾಮ್ ಚೇತನ್, ಶಾಸಕರಾದ ಜಮೀರ್ ಅಹ್ಮದ್ ಖಾನ್ ಅವರು, ತಮ್ಮ ಬಿಡುವಿಲ್ಲದ ರಾಜಕೀಯ ಚಟುವಟಿಕೆಗಳ ನಡುವೆಯೂ ಚಿತ್ರಮಂದಿರಕ್ಕೆ ಬಂದು ಕುಳಿತು, ನಮ್ಮ ಚಿತ್ರ ನೋಡಿ ಮೆಚ್ಚಿಕೊಂಡಿದ್ದಕ್ಕಾಗಿ ಅವರಿಗೆ ನನ್ನ ಅನಂತ ಧನ್ಯವಾದಗಳು. ಇದು ಕಲೆ ಮತ್ತು ಕಲಾವಿದರ ಬಗ್ಗೆ ಅವರಿಗಿರುವ ಅಭಿಮಾನ ಮತ್ತು ಪ್ರೀತಿಯನ್ನು ತೋರಿತ್ತದೆ ಎಂದು ಹೇಳಿದರು.
