ಚೆನ್ನೈ: ‘ಜೋಸೆಫ್ ವಿಜಯ್ ಎಂಬ ನಾನು…’ ಎಂದು ತಮಿಳು ಭಾಷೆಯಲ್ಲಿ ನಟ ವಿಜಯ್ ತಮಿಳುನಾಡಿನ ಮುಂದಿನ ಮುಖ್ಯಮಂತ್ರಿಯಾಗಲಿದ್ದಾರೆ ಎಂಬ ಸೂಚನೆಯೊಂದಿಗೆ ಅಭಿಮಾನಿಗಳು ಮಧುರೈನಲ್ಲಿ ವ್ಯಾಪಕವಾಗಿ ಅಂಟಿಸಿದ ಪೋಸ್ಟರ್ ಗಳು ರಾಜಕೀಯ ವಲಯಗಳಲ್ಲಿ ಸಂಚಲನ ಸೃಷ್ಟಿಸಿದೆ.
ಪೋಸ್ಟರ್ ನಲ್ಲಿ ‘2021 ಉಲ್ಲಾಚಿಯಿಲ್ ನಲ್ಲ ತೇರ್ವ್, ನಿಂಗಲ್ ತಾನ್ ತಮಿಳಗತ್ತಿನ್ ಇರುದಿ ತೀರ್ವ್’ (2021ರ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಉತ್ತಮ ಫಲಿತಾಂಶ. ನೀವು ತಮಿಳುನಾಡಿಗೆ ಅಂತಿಮ ಪರಿಹಾರ) ಎಂದು ಬರೆಯಲಾಗಿದೆ. ವಿಜಯ್ ಪ್ರಮಾಣವಚನ ಸ್ವೀಕರಿಸುವಂತೆ ಇರುವ ಚಿತ್ರವನ್ನು ಸಹ ಪೋಸ್ಟರ್ ನಲ್ಲಿ ಕಾಣಬಹುದು.
ಅಕ್ಟೋಬರ್ 6 ಮತ್ತು 9 ರಂದು ರಾಜ್ಯದ ಹೊಸದಾಗಿ ರಚನೆಯಾದ ಒಂಬತ್ತು ಜಿಲ್ಲೆಗಳಿಗೆ ನಡೆದ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ‘ಇಳಯ ದಳಪತಿ ವಿಜಯ್ ಮಕ್ಕಳ್ ಇಯಕ್ಕಂ’ 169 ಸ್ಥಾನಗಳಲ್ಲಿ ಸ್ಪರ್ಧಿಸಿ 110 ಸ್ಥಾನಗಳನ್ನು ಗೆದ್ದು ಸುದ್ದಿಯಾಗಿತ್ತು.
ಪ್ರಚಾರಕ್ಕೆ ವಿಜಯ್ ಅವರ ಹೆಸರು, ಚಿತ್ರ ಮತ್ತು ಧ್ವಜವನ್ನು ವ್ಯಾಪಕವಾಗಿ ಬಳಸಲಾಗಿತ್ತು. ಇದಕ್ಕೆ ವಿಜಯ್ ಮೌನ ಸಮ್ಮತಿ ನೀಡಿದ್ದರು ಎಂದು ಅಭಿಮಾನಿಗಳು ಹೇಳುತ್ತಾರೆ.
