ತಿರುವನಂತಪುರಂ: ವಿದ್ಯಾರ್ಥಿನಿಯೊಬ್ಬಳು ನೇಣು ಬಿಗಿದು ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾಳೆ. ಕೇರಳದ ರಾಜಧಾನಿ ತಿರುವನಂತಪುರಂ ಜಿಲ್ಲೆಯ ಚಿರಯಂಕೀಶ್ ಎಂಬಲ್ಲಿನ ಶ್ರೀ ಶಾರದಾವಿಲಾಸಂ ಶಾಲೆಯ ವಿದ್ಯಾರ್ಥಿನಿ ರಾಖಿಶ್ರೀ ಮೃತಪಟ್ಟವರು.
ಮೇ.19ರ ಶುಕ್ರವಾರದಂದು ಕೇರಳದಾದ್ಯಂತ ಪ್ರಕಟಗೊಂಡ SSLC ಪರೀಕ್ಷಾ ಫಲಿತಾಂಶದಲ್ಲಿ ರಾಖಿಶ್ರೀ ಸಂಪೂರ್ಣ ಎ ಪ್ಲಸ್‌ ಪಡೆದಿದ್ದರು. ರಾಖಿಶ್ರೀ ಸೇರಿದಂತೆ ಉತ್ತೀರ್ಣಗೊಂಡ ಎಲ್ಲಾ ವಿದ್ಯಾರ್ಥಿಗಳು ಶನಿವಾರ ಶಾಲೆಯಲ್ಲಿ ಹಾಜರಿದ್ದರು. ನಂತರ ಸಂಜೆ ವೇಳೆ ವಿದ್ಯಾರ್ಥಿನಿ ಮನೆಯೊಳಗೆ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ.
ಸದ್ಯ ಮೃತದೇಹವನ್ನು ಚಿರಯಂಕೀಶ್ ತಾಲೂಕು ಆಸ್ಪತ್ರೆಯ ಶವಾಗಾರದಲ್ಲಿ ಇರಿಸಲಾಗಿದೆ. ನಾಳೆ ಮರಣೋತ್ತರ ಪರೀಕ್ಷೆಗಾಗಿ ವೈದ್ಯಕೀಯ ಕಾಲೇಜಿಗೆ ಸ್ಥಳಾಂತರಿಸಲಾಗುವುದು. ಮೃತರು ಓರ್ವ ಸಹೋದರಿ, ತಂದೆ ರಾಜೀವ್, ತಾಯಿ ಶ್ರೀವಿದ್ಯಾ ಹಾಗೂ ಅಪಾರ ಬಂಧು ಬಳಗವನ್ನು ಅಗಲಿದ್ದಾರೆ.
