ಹೆಲ್ಸಿಂಕಿ: ಇಸ್ಲಾಂ-ವಿರೋಧಿ ಬಲಪಂಥೀಯ ಗುಂಪೊಂದು ಪವಿತ್ರ ಕುರ್ ಆನ್ ಅನ್ನು ಸುಟ್ಟುಹಾಕಿದ್ದರಿಂದ ಉಂಟಾದ ಗಲಭೆ ಮತ್ತು ಪ್ರತಿಭಟನೆ ಸ್ವೀಡನ್ ನ ಹಲವು ನಗರಗಳಲ್ಲಿ ಸತತ ನಾಲ್ಕನೇ ದಿನವೂ ಮುಂದುವರಿದಿದೆ.
ಏತನ್ಮಧ್ಯೆ, ಸ್ಟ್ರಾಮ್ ಕುರ್ಸ್ ಅಥವಾ ಹಾರ್ಡ್ ಲೈನ್ ಪಕ್ಷದ ನೇತೃತ್ವ ವಹಿಸಿದ 40 ವರ್ಷದ ಡ್ಯಾನಿಷ್-ಸ್ವೀಡಿಷ್ ತೀವ್ರಗಾಮಿ ರಾಸ್ಮಸ್ ಪಲುಡಾನ್ ತಾನು ಇಸ್ಲಾಮಿನ ಅತ್ಯಂತ ಪವಿತ್ರ ಗ್ರಂಥವನ್ನು ಸುಟ್ಟುಹಾಕಿದ್ದೇನೆ ಮತ್ತು ಅದನ್ನು ಪುನಾರಾವರ್ತಿಸುತ್ತೇನೆ ಎಂದು ಘೋಷಿಸಿದ್ದಾನೆ ಎನ್ನಲಾಗಿದೆ
ಸ್ವೀಡನ್ ನ ನಾರ್ಕೊಪಿಂಗ್ ನಗರದಲ್ಲಿ ಭಾನುವಾರ ಮೂವರು ಗಲಭೆಕೋರರಿಗೆ ಪೊಲೀಸ್ ಗುಂಡೇಟು ತಗುಲಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಗೊಂಡ ಮೂವರನ್ನು ಅಪರಾಧದ ಶಂಕೆಯ ಮೇಲೆ ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿಕೆಯಲ್ಲಿ ತಿಳಿಸಿದ್ದು, ಯಾರಿಗೂ ಗಂಭೀರ ಗಾಯಗಳಾಗಿಲ್ಲ ಎಂದು ತಿಳಿಸಿದ್ದಾರೆ.
ಹಲವು ವಾಹನಗಳಿಗೆ ಬೆಂಕಿ ಹಚ್ಚಲಾಗಿದ್ದು ಕನಿಷ್ಠ 17 ಜನರನ್ನು ಬಂಧಿಸಲಾಗಿದೆ. ದಕ್ಷಿಣ ನಗರ ಮಾಲ್ಮೋದಲ್ಲಿ ಬಲಪಂಥೀಯ ರಾಲಿ ಸಮಯದಲ್ಲಿ ಬಸ್ ಸೇರಿದಂತೆ ವಾಹನಗಳಿಗೆ ಬೆಂಕಿ ಹಚ್ಚಲಾಗಿದೆ ಎಂದು ಪ್ರಾದೇಶಿಕ ಮಾಧ್ಯಮಗಳು ವರದಿ ಮಾಡಿವೆ.
ಕುರ್ ಆನ್ ಅನ್ನು ಸುಡುವ ಸ್ಟ್ರಾಮ್ ಕುರ್ಸ್ ನ ಯೋಜನೆಗಳ ವಿರುದ್ಧ ಸ್ವೀಡನ್ ನಲ್ಲಿ ಈ ಹಿಂದೆ ಪ್ರತಿಭಟನೆಗಳು ನಡೆದಿದ್ದು, ನಾಲ್ಕನೇ ದಿನವೂ ಅದು ಮುಂದುವರಿದಿದೆ.
