ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾದ ಕಾರ್ಯಕರ್ತ ರಶೀದ್ ಅಹ್ಮದ್ ಎಂಬವರನ್ನು ಉತ್ತರ ಪ್ರದೇಶ ಭಯೋತ್ಪಾದನಾ ವಿರೋಧಿ ದಳ(ಎಟಿಎಸ್)ದ ಉತ್ತರ ಪ್ರದೇಶ ಪೊಲೀಸರು ಎರಡು ದಿನಗಳ ಹಿಂದೆ ಬಂಧಿಸಿದ್ದು, ಈ ಘಟನೆಯನ್ನು ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ ತೀವ್ರವಾಗಿ ಖಂಡಿಸಿದೆ.
ಮುಂಬೈ ನಿವಾಸಿ ರಶೀದ್, ಉತ್ತರ ಪ್ರದೇಶದಲ್ಲಿರುವ ತನ್ನ ಕುಟುಂಬಿಕರನ್ನು ಭೇಟಿ ಮಾಡಿ ಮುಂಬೈಗೆ ಹಿಂದಿರುಗುತ್ತಿದ್ದ ವೇಳೆ ಎರಡು ದಿನಗಳಿಂದ ನಾಪತ್ತೆಯಾಗಿದ್ದರು. ಕಳೆದ ಎರಡು ದಿನಗಳಿಂದ ಆತನೊಂದಿಗೆ ಸಂವಹನ ನಡೆಸಲು ಸಾಧ್ಯವಾಗದ ಕಾರಣ ಆತನ ಕುಟುಂಬಸ್ಥರು ಅಲಾಹಾಬಾದ್ ಹೈಕೋರ್ಟ್ ನಲ್ಲಿ ದೂರು ದಾಖಲಿಸಿದ್ದರು. ಎರಡು ದಿನಗಳ ಹಿಂದೆ ಆತನನ್ನು ವಶಕ್ಕೆ ಪಡೆದುಕೊಂಡಿದ್ದ ಎಟಿಎಸ್, ಆತನ ಕುಟುಂಬಸ್ಥರು ಹೈ ಕೋರ್ಟ್ ನಲ್ಲಿ ದೂರು ದಾಖಲಿಸಿದ ನಂತರ ಆತನ ಬಂಧನವನ್ನು ದಾಖಲಿಸಿಕೊಂಡಿತು ಮತ್ತು ಕಲ್ಪಿತ ಪ್ರಕರಣಗಳೊಂದಿಗೆ ಮಾಧ್ಯಮದ ಮುಂದೆ ಪ್ರಸ್ತುತಪಡಿಸಿತು ಎಂಬುದು ಸ್ಪಷ್ಟವಾಗಿದೆ.
ಪಾಪ್ಯುಲರ್ ಫ್ರಂಟ್ ಕಾರ್ಯಕರ್ತನಾಗಿರುವ ಈತನ ಮೇಲೆ ಎಟಿಎಸ್ ಮಾಡಿರುವ ಆರೋಪಗಳು ಅಸಂಬದ್ಧವಾಗಿವೆ. ಇದು ಸಂಘಟನೆಯ ವಿರುದ್ಧ ಉತ್ತರ ಪ್ರದೇಶ ಸರಕಾರದ ದ್ವೇಷ ರಾಜಕೀಯ ಭಾಗವಾಗಿದೆ. ಕೇವಲ ಸಂಘಟನೆಯ ಸದಸ್ಯನಾಗುವುದನ್ನು ಅಪರಾಧ ಎಂದು ಪರಿಗಣಿಸುವುದು ಮತ್ತು ಅದರ ಕಾರ್ಯಚಟುವಟಿಕೆಗಳೊಂದಿಗೆ ಸಹಭಾಗಿಗಳಾದ ಜನರನ್ನು ಶಿಕ್ಷಿಸುವುದು ಯುಪಿ ಸರಕಾರದ ರಾಜಕೀಯ ನಿರ್ಧಾರವಾಗಿದೆ. ಯುಪಿಯಲ್ಲಿ ಸಿಎಎ ವಿರೋಧಿ ಪ್ರತಿಭಟನೆಗಳ ಬಳಿಕ ಪಾಪ್ಯುಲರ್ ಫ್ರಂಟ್ ನ ರಾಜ್ಯ ಅಡ್ಹೋಕ್ ಕಮಿತಿಯ ಮೂವರು ಸದಸ್ಯರನ್ನು ಕಲ್ಪಿತ ಪ್ರಕರಣಗಳಲ್ಲಿ ಬಂಧಿಸಿ, ಕಸ್ಟಡಿಯಲ್ಲಿ ಚಿತ್ರಹಿಂಸೆ ನೀಡಲಾಗಿತ್ತು. ಸಿಎಎ ವಿರೋಧಿ ಪ್ರತಿಭಟನಾಕಾರರ ಮೇಲೆ ಪೊಲೀಸರ ಆಕ್ರಮಣದ ವೇಳೆ ನಡೆದ ಸಾವುಗಳಿಗೆ ಸಂಬಂಧಿಸಿ ನ್ಯಾಯಾಂಗ ತನಿಖೆ ನಡೆಸಬೇಕೆಂದು ಕೋರಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ದಾಖಲಿಸಿದ ಕಾರಣಕ್ಕಾಗಿ ಮತ್ತೋರ್ವ ಅಡ್ಹೋಕ್ ಕಮಿಟಿಯ ಸದಸ್ಯನನ್ನು ಬಂಧಿಸಲಾಗಿತ್ತು.
ಈ ರೀತಿಯ ದುರುದ್ದೇಶಪೂರಿತ ರಾಜಕೀಯ ಪ್ರತೀಕಾರದ ಮೂಲಕ ಸಂಘಟನೆಯನ್ನು ಬೆದರಿಸಲು ಸಾಧ್ಯವಿಲ್ಲ ಮತ್ತು ನಮ್ಮ ಪ್ರಜಾಸತ್ತಾತ್ಮಕ ಮತ್ತು ಕಾನೂನಾತ್ಮಕ ವಿಧಾನಗಳ ಹೋರಾಟವು ನಿರಂತರವಾಗಿರಲಿದೆ ಎಂಬುದನ್ನು ಪಾಪ್ಯುಲರ್ ಫ್ರಂಟ್ ಸ್ಪಷ್ಟಪಡಿಸಿದೆ. ನಮ್ಮ ಕಾರ್ಯಕರ್ತನನ್ನು ಕೂಡಲೇ ಬಿಡುಗಡೆಗೊಳಿಸಬೇಕು ಮತ್ತು ಅಮಾಯಕ ಮುಸ್ಲಿಮ್ ಯುವಕರ ಬಂಧನ ಮತ್ತು ಚಿತ್ರಹಿಂಸೆಯನ್ನು ನಿಲ್ಲಿಸಬೇಕೆಂದು ನಾವು ಯೋಗಿ ಸರಕಾರವನ್ನು ಆಗ್ರಹಿಸಿದೆ.
