ಆಗ್ರಾ: ತಾಜ್ ಮಹಲ್ ನ ಒಳಗೆ ಮುಚ್ಚಿದ 22ಕೊಠಡಿಗಳಲ್ಲಿ ಪ್ರಾಚೀನ ಕಾಲದಿಂದಲೂ ಹಿಂದೂ ವಿಗ್ರಹಗಳು ಇವೆ ಎಂಬ ವದಂತಿಗಳನ್ನು ಭಾರತೀಯ ಪುರಾತತ್ವ ಸರ್ವೇಕ್ಷಣೆಯ (ASI) ಅಧಿಕಾರಿಗಳು ನಿರಾಕರಿಸಿದ್ದಾರೆ.
ಸಮಾಧಿಯೊಳಗೆ ಮುಚ್ಚಿದ ಕೊಠಡಿಗಳನ್ನು ತೆರೆಯಲು ASI ಗೆ ನಿರ್ದೇಶನ ನೀಡುವಂತೆ ಕೋರಿ ಸಲ್ಲಿಸಲಾಗಿದ್ದ ಅರ್ಜಿಯನ್ನು ಅಲಹಾಬಾದ್ ಹೈಕೋರ್ಟ್ ನ ಲಕ್ನೋ ಪೀಠವು ವಜಾಗೊಳಿಸಿದ ಹಿನ್ನೆಲೆಯಲ್ಲಿ ಈ ಹೇಳಿಕೆಗಳು ಹೊರ ಬಂದಿವೆ.
ಈ ಕುರಿತು ಮಾಧ್ಯಮಕ್ಕೆ ಪ್ರತಿಕ್ರಿಯಿಸಿದ ASI ಅಧಿಕಾರಿಗಳು, ಸಲ್ಲಿಸಲಾದ ಅರ್ಜಿಯಲ್ಲಿ ಎರಡು ವಿಷಯದಲ್ಲಿ ತಪ್ಪಾಗಿದೆ. ಒಂದು, ಆ ಕೊಠಡಿಗಳನ್ನು ಅಧಿಕೃತವಾಗಿ ಕೋಶಗಳು ಎಂದು ಕರೆಯಲಾಗುತ್ತದೆ. ಅವುಗಳನ್ನು ಶಾಶ್ವತವಾಗಿ ಮುಚ್ಚಿಲ್ಲ ಮತ್ತು ಸಂರಕ್ಷಣಾ ಕಾರ್ಯಕ್ಕಾಗಿ ಇತ್ತೀಚೆಗೆ ತೆರೆಯಲಾಗಿದೆ. ಎರಡು, ಇದುವರೆಗೆ ಎಲ್ಲಾ ದಾಖಲೆಗಳನ್ನು ಪರಿಶೀಲಿಸಲಾಗಿದ್ದು, ಯಾವುದೇ ವಿಗ್ರಹಗಳನ್ನು ಉಪಸ್ಥಿತಿಯನ್ನು ಸೂಚಿಸಿಲ್ಲ ಎಂದು ತಿಳಿಸಿದ್ದಾರೆ.
“ಇದುವರೆಗೆ ಪರಿಶೀಲಿಸಲಾದ ವಿವಿಧ ದಾಖಲೆಗಳು ಮತ್ತು ವರದಿಗಳು ಯಾವುದೇ ವಿಗ್ರಹಗಳ ಅಸ್ತಿತ್ವವನ್ನು ತೋರಿಸಿಲ್ಲ” ಎಂದು ಮೂರು ತಿಂಗಳ ಹಿಂದೆ ನಡೆದ ಜೀರ್ಣೋದ್ಧಾರ ಕಾರ್ಯದ ಹಿರಿಯ ಅಧಿಕಾರಿಯೊಬ್ಬರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
