ಪಾಲಕ್ಕಾಡ್: ಮೊಬೈಲ್ ಟವರ್ ಕಳವು ಪ್ರಕರಣದಲ್ಲಿ ಆರೋಪಿಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ.
ತಮಿಳುನಾಡಿನ ಸೇಲಂ ಜಿಲ್ಲೆಯ ಮೆಟ್ಟೂರು ಮೂಲದ ಗೋಕುಲ್ ಎಂಬಾತನನ್ನು ಕೇರಳದ ಕಸಬಾ ಠಾಣೆಯ ಪೊಲೀಸರು ಬಂಧಿಸಿದ್ದಾರೆ. ಪ್ರಕರಣದ ಪ್ರಮುಖ ಆರೋಪಿ ಸೇಲಂ ಮೂಲದ ಜಿ ಕೃಷ್ಣಕುಮಾರ್‌ನನ್ನು ಈ ಹಿಂದೆ ಬಂಧಿಸಲಾಗಿತ್ತು.
ಪುದುಚೇರಿಯಲ್ಲಿ ನಿಷ್ಕ್ರಿಯಗೊಂಡಿದ್ದ ಮೊಬೈಲ್ ಟವರ್ ಕಾಣೆಯಾಗಿತ್ತು. ಮುಂಬೈ ಮೂಲದ ಜಿಟಿಎಲ್ ಇನ್‌ಫ್ರಾಸ್ಟ್ರಕ್ಚರ್ ಲಿಮಿಟೆಡ್‌ನ ಒಡೆತನದ ವಿವಿಧ ಸ್ಥಳಗಳಲ್ಲಿನ ಸುಮಾರು 100 ಕೋಟಿ ರೂ. ಅಧಿಕ ಮೌಲ್ಯದ ಬರೋಬ್ಬರಿ 600 ಮೊಬೈಲ್ ಟವರ್‌ಗಳನ್ನು ಕಳವು ಮಾಡಲಾಗಿತ್ತು.
ಪಾಲಕ್ಕಾಡ್ ಜಿಲ್ಲೆಯೊಂದರಿಂದಲೇ ಏಳು ಟವರ್‌ಗಳನ್ನು ಲೂಟಿ ಮಾಡಲಾಗಿತ್ತು.
ಏರ್‌ಸೆಲ್ ಕಂಪನಿಗೆ ಸೇರಿದ ಈ ಟವರ್‌ಗಳು 2018 ರಲ್ಲಿ ನಿಷ್ಕ್ರಿಯಗೊಂಡಿತ್ತು. ನಂತರ ಇವುಗಳನ್ನು ಜಿಟಿಎಲ್ ಇನ್‌ಫ್ರಾಸ್ಟ್ರಕ್ಚರ್ ಲಿಮಿಟೆಡ್ ಖರೀದಿಸಿತ್ತು.
