ಚಿಕ್ಕಮಗಳೂರು: ಮತಾಂತರ ನಿಷೇಧ ಕಾಯ್ದೆ ಮೊದಲೇ ಇತ್ತು. ಬಿಜೆಪಿ ಮಾಡಿದ್ದ ಕೆಲ ದೋಷಪೂರಿತ ತಪ್ಪುಗಳನ್ನಷ್ಟೇ ಸರಿಪಡಿಸಲಾಗಿದೆ ಎಂದು ಇಂಧನ ಸಚಿವ ಕೆ.ಜೆ.ಜಾರ್ಜ್ ಹೇಳಿದ್ದಾರೆ.
ಈ ಬಗ್ಗೆ ನಗರದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಬಲವಂತ ಮತ್ತು ಆಮಿಷ ಒಡ್ಡಿ ಮತಾಂತರ ಮಾಡುವುದು ತಪ್ಪು. ಇದು ಹಳೇ ಕಾಯ್ದೆಯಲ್ಲೇ ಇದೆ’ ಎಂದು ಹೇಳಿದರು.
‘ಆರೋಪಿತರೇ ಸಾಕ್ಷಿ ಒದಗಿಬೇಕು ಎಂಬಿತ್ಯಾದಿ ದೋಷಪೂರಿತ ಸೆಕ್ಷನ್ ಗಳನ್ನು ಸೇರಿಸಲಾಗಿತ್ತು. ಅವುಗಳನ್ನು ಕೈಬಿಡಲಾಗಿದೆ. ಈ ರೀತಿ ಕಾಯ್ದೆ ತಂದು ಬಿಜೆಪಿ ಸಾಧಿಸಿದ್ದೇನು, ಎಷ್ಟು ಪ್ರಕರಣ ದಾಖಲಿಸಿದೆ’ ಎಂದು ಪ್ರಶ್ನಿಸಿದರು.
