ಜಮ್ಮು ಕಾಶ್ಮೀರದಲ್ಲಿ ಬಿಜೆಪಿಯ ಗುಲಾಂ ರಸೂಲ್ ದಂಪತಿಗೆ ಗುಂಡು

ಜಮ್ಮು ಕಾಶ್ಮೀರ: ಜಮ್ಮು ಕಾಶ್ಮೀರದ ಅನಂತನಾಗ್ ಜಿಲ್ಲೆಯಲ್ಲಿ ಸರಪಂಚ ಆಗಿರುವ ಕುಲ್ ಗಾಂವ್ ಜಿಲ್ಲೆಯ ಬಿಜೆಪಿ ಕಿಸಾನ್ ಮೋರ್ಚಾ ಅಧ್ಯಕ್ಷ ಗುಲಾಂ ರಸೂಲ್ ದಾರ್ ಮತ್ತವರ ಮಡದಿ ಜವಾಹರ ಬಾನೂ ಅವರು ಗುಂಡೇಟಿಗೆ ಬಲಿಯಾಗಿದ್ದಾರೆ.

ಉಗ್ರರ ಗುಂಡೇಟಿಗೆ ಗಾಯಗೊಂಡ ಅವರನ್ನು ಕೂಡಲೆ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಅವರು ಬದುಕುಳಿಯಲಿಲ್ಲ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಕುಲ್ ಗಾಂವ್ ಜಿಲ್ಲೆಯ ರೆದ್ವಾನಿ ವಾಸಿಯಾದ ದಾರ್ ಸರಪಂಚನಾಗಿದ್ದು, ಬಿಜೆಪಿ ಜೊತೆ ಗುರುತಿಸಿಕೊಂಡಿದ್ದರು. ಆದರೆ ದಾರ್ ಈಗ ಅನಂತನಾಗ್ ನ ಬಾಡಿಗೆ ಮನೆಯಲ್ಲಿ ವಾಸವಿದ್ದರು.

ಟಿಆರ್ ಎಫ್- ದ ರೆಸಿಸ್ಟೆಂಟ್ ಫೋರ್ಸ್ ಗುಂಡಿನ ಹೊಣೆ ವಹಿಸಿಕೊಂಡಿದೆ. ಅವರೆಲ್ಲ ಜನದ್ರೋಹಿಗಳು. ನಮ್ಮ ಗೇಜಲ್ ತುಕಡಿ ದಾಳಿ ಮಾಡಿತ್ತು ಎಂದು ದ ರೆಸಿಸ್ಟೆಂಟ್ ಫೋರ್ಸ್ ಹೇಳಿಕೆ ನೀಡಿದೆ. ಬಿಜೆಪಿಯ ಜಮ್ಮು ಕಾಶ್ಮೀರದ ವಕ್ತಾರ ಅಲ್ತಾಫ್ ಠಾಕೂರ್ ಇದನ್ನು ಕ್ರೂರ ಕೃತ್ಯ ಎಂದು ಖಂಡಿಸಿದ್ದಾರೆ. ಇದು ಉಗ್ರರ ಖಿನ್ನತೆಯ ಫಲ, ಇದರಿಂದ ಯಾರಿಗೂ ಲಾಭವಿಲ್ಲ ಎಂದು ಸಹ ಅವರು ಹೇಳಿದರು.