ವಾಷಿಂಗ್ಟನ್ : ಅಮೆರಿಕದ ಭಾವೀ ಅಧ್ಯಕ್ಷ ಜೋ ಬೈಡನ್ ಅವರ ಪತ್ನಿ ಜಿಲ್ ಬೈಡನ್ ಅವರ ನೀತಿ ನಿರ್ದೇಶಕಿ (ಪಾಲಿಸಿ ಡೈರೆಕ್ಟರ್) ಆಗಿ ಭಾರತೀಯ ಮೂಲದ ಮಾಲಾ ಅಡಿಗ ಅವರನ್ನು ನೇಮಕ ಮಾಡಲಾಗಿದೆ. ಜೋ ಬೈಡನ್ ಅವರು ಈ ನೇಮಕಾತಿ ಮಾಡಿದ್ದಾರೆ.
ಅಡಿಗ ಅವರು ಜಿಲ್ ಬೈಡನ್ ಅವರಿಗೆ ಹಿರಿಯ ಸಲಹೆಗಾರರಾಗಿ ಸೇವೆ ಸಲ್ಲಿಸಿದ್ದರು ಮತ್ತು ಬೈಡನ್ – ಕಮಲಾ ಹ್ಯಾರಿಸ್ ಪ್ರಚಾರದಲ್ಲಿ ಹಿರಿಯ ನೀತಿ ಸಲಹೆಗಾರರಾಗಿದ್ದರು. ಇದಕ್ಕೂ ಮೊದಲು ಅಡಿಗ ಅವರು ಬೈಡನ್ ಫೌಂಡೇಶನ್ ನಲ್ಲಿ ಉನ್ನತ ಶಿಕ್ಷಣ ಮತ್ತು ಸೇನಾ ಕುಟುಂಬಗಳ ನಿರ್ದೇಶಕಿಯಾಗಿದ್ದರು.
ಮಾಜಿ ಅಧ್ಯಕ್ಷ ಬರಾಕ್ ಒಬಾಮ ಅವಧಿಯಲ್ಲೂ ಮಾಲಾ ಅಡಿಗ ಹಲವು ಪ್ರತಿಷ್ಠಿಯ ಹುದ್ದೆಗಳನ್ನು ನಿರ್ವಹಿಸಿದ್ದರು.
ನ್ಯಾಯವಾದಿಯಾಗಿರುವ ಮಾಲಾ ಅಡಿಗ ಅಮೆರಿಕ ಸರಕಾರದಲ್ಲಿ ಗುಮಾಸ್ತೆಯಾಗಿ ಕೆಲಸ ಮಾಡಿದ್ದವರು. 2008ರಲ್ಲಿ ಬರಾಕ್ ಒಬಾಮಾ ಪರ ಪ್ರಚಾರದಲ್ಲಿ ಸೇರಿಕೊಳ್ಳುವಾಗ, ಚಿಕಾಗೊ ಕಾನೂನು ಸಂಸ್ಥೆಯಲ್ಲಿ ಅವರು ಸೇವೆ ಸಲ್ಲಿಸುತ್ತಿದ್ದರು.
