ಹೊಳೆನರಸೀಪುರ: ಮನೆಯ ಮುಂದಿನ ಅಂಗಳದಲ್ಲಿ ಮಲಗಿದ್ದ ಸಾಕು ನಾಯಿಯನ್ನು ಚಿರತೆಯೊಂದು ಹೊಂಚು ಹಾಕಿ ಹೊತ್ತೊಯ್ದ ಘಟನೆ ತಾಲೂಕಿನ ಹೊಸಕೊಪ್ಪಲು ಪ್ರದೇಶದಲ್ಲಿ ನಡೆದಿದ್ದು, ಸಿಸಿ ಟಿವಿಯಲ್ಲಿ ಸೆರೆಯಾದ ದೃಶ್ಯ ನೋಡುಗರನ್ನು ಬೆಚ್ಚಿ ಬೀಳಿಸುವಂತಿದೆ.
ರಾತ್ರೋರಾತ್ರಿ ಗ್ರಾಮದ ದೇವೇಗೌಡ ಎಂಬವರ ಮನೆ ಮುಂದಿನ ಕಂಪೌಂಡ್ ಮೇಲೇರಿ ಕುಳಿತು ಸುತ್ತಮುತ್ತಲೂ ಗಮನಿಸಿದ ಚಿರತೆ, ಸದ್ದು ಮಾಡಿದರೆ ನಾಯಿ ಬೊಗಳಬಹುದು ಎಂದು ಕೆಲಹೊತ್ತು ಕಾಯುತ್ತಾ ಕೂರುತ್ತದೆ. ಆದರೆ ನಾಯಿ ಯಾವುದೇ ರೀತಿಯಲ್ಲೂ ಪ್ರತಕ್ರಿಯಿಸದಿರುವುದನ್ನು ಅರಿತ ಚಿರತೆ ಏಕಾಏಕಿ ಮಲಗಿದ್ದ ನಾಯಿಯನ್ನು ಕಚ್ಚಿ ಮತ್ತೆ ಕಂಪೌಂಡ್ ಹಾರಿ ಅಲ್ಲಿಂದ ಕಾಲ್ಕಿತ್ತಿದೆ.
ಈ ಚಿರತೆ ಕೇವಲ ರಾತ್ರಿ ವೇಳೆ ಮಾತ್ರ ಬೇಟೆಯಲ್ಲಿ ತೊಡಗುವುದಿಲ್ಲ. ಹಗಲು ವೇಳೆಯೇ ಗ್ರಾಮದ ಸುತ್ತ ಮುತ್ತ ಅನೇಕ ಸಲ ಕಾಣಿಸಿಕೊಂಡಿದೆ. ಅಲ್ಲದೆ ಕುರಿ, ಮೇಕೆ, ನಾಯಿ ಸೇರಿದಂತೆ ಅನೇಕ ಸಾಕುಪ್ರಾಣಿಗಳನ್ನು ಹೊತ್ತೊಯ್ದಿದೆ. ಈಗ ಸಾಕು ನಾಯಿ ಹೊತ್ತೊಯ್ದ ಚಿರತೆ ನಾಳೆ ಮನುಷ್ಯರ ಮೇಲೂ ಎರಗಬಹುದು. ಈ ಸನ್ನಿವೇಶ ಮರುಕಳಿಸುವ ಮುನ್ನ, ಕೂಡಲೇ ಭಕ್ಷಕ ಚಿರತೆ ಯನ್ನು ಸೆರೆ ಹಿಡಿಯಬೇಕು ಎಂದು ಗ್ರಾಮಸ್ಥರು ಅರಣ್ಯ ಇಲಾಖೆಯವರನ್ನು ಒತ್ತಾಯಿಸಿದ್ದಾರೆ.
