ನವದೆಹಲಿ : ಪ್ರಧಾನಿ ನರೇಂದ್ರ ಮೋದಿ ಸರಕಾರದ ನೂತನ ಕೃಷಿ ನೀತಿಯನ್ನು ವಿರೋಧಿಸಿ ದೆಹಲಿ ಗಡಿ ಭಾಗಗಳಲ್ಲಿ ರೈತರು ನಡೆಸುತ್ತಿರುವ ಪ್ರತಿಭಟನೆಯ ಬಗ್ಗೆ ಬಿಜೆಪಿ ಬೆಂಬಲಿಗರಿಂದ ಸಾಕಷ್ಟು ವ್ಯಂಗ್ಯ, ಅಪಹಾಸ್ಯ ಮಾಡಲಾಗುತ್ತಿದೆ. ಈ ನಡುವೆ, ರೈತರಿಗೆ ಫಿಝಾ ವಿತರಿಸಿರುವುದೂ ವ್ಯಂಗ್ಯಕ್ಕೆ ಕಾರಣವಾಗಿತ್ತು. ಬಿಜೆಪಿಗರ ಈ ವರ್ತನೆಯ ವಿರುದ್ಧ ಸಿಡಿದೆದ್ದಿರುವ ನಟ-ಗಾಯಕ ದಿಲ್ಜೀತ್ ದೊಸಾಂಜಿ, ಖಡಕ್ ಪ್ರತಿಕ್ರಿಯೆಯನ್ನೇ ನೀಡಿದ್ದಾರೆ.
“ರೈತರು ವಿಷ ಸೇವಿಸುತ್ತಿರುವ ಬಗ್ಗೆ ಯಾವ ಕಳವಳವೂ ವ್ಯಕ್ತವಾಗುವುದಿಲ್ಲ, ಆದರೆ ರೈತರು ಫಿಝಾ ತಿನ್ನುವುದು ಸುದ್ದಿಯಾಗುತ್ತದೆ’’ ಎಂದು ದಿಲ್ಜೀತ್ ಕಿಡಿಗಾರಿದ್ದಾರೆ. ದಿಲ್ಜೀತ್ ಅವರ ಟ್ವೀಟ್ ಅನ್ನು ರೈತರ ಪರವಾಗಿರುವವರು ದೊಡ್ಡ ಮಟ್ಟದಲ್ಲಿ ಬೆಂಬಲಿಸಿದ್ದಾರೆ.
ದೆಹಲಿ-ಹರ್ಯಾಣ ಗಡಿ ಪ್ರದೇಶವಾದ ಸಿಂಘುವಿನಲ್ಲಿ ಕಳೆದ ವಾರ ರೈತರಿಗೆ ಫಿಝಾ ವಿತರಿಸಲಾಗಿತ್ತು. ಈ ವಿಷಯಕ್ಕೆ ಸಂಬಂಧಿಸಿ ಕೆಲವರು ವ್ಯಂಗ್ಯವಾಡಿದ್ದರು.
ಫಿಝಾಗೆ ಹಿಟ್ಟು ನೀಡಿರುವ ರೈತರು ತಮಗಾಗಿ ಒಂದು ತುಂಡು ಕೊಂಡುಕೊಳ್ಳುವಷ್ಟು ಸಮರ್ಥರಿದ್ದಾರೆ ಎಂದು ರೈತರಿಗೆ ಫಿಝಾ ವಿತರಿಸಿದ ನಾಲ್ವರು ಸ್ನೇಹಿತರಲ್ಲಿ ಓರ್ವರಾದ ಶಣ್ಬೀರ್ ಸಿಂಗ್ ಸಂಧು ಹೇಳಿದ್ದಾರೆ.
