ಬೀಜಿಂಗ್ : ಚೀನಾದಲ್ಲಿನ ಚಳಿಗಾಲದ ಒಲಿಂಪಿಕ್ಸ್ ಬಹಿಷ್ಕರಿಸುವ ವಿಷಯದಲ್ಲಿ ಆಸ್ಟ್ರೇಲಿಯಾ, ಅಮೆರಿಕ ಮತ್ತು ಬ್ರಿಟನ್ ಜೊತೆ ನಿಲ್ಲುವುದಾಗಿ ಕೆನಡಾದ ಪ್ರಧಾನಿ ಜಸ್ಟಿನ್ ಟ್ರೋಡೋ ಹೇಳಿದ್ದಾರೆ.
ಮಾನವ ಹಕ್ಕುಗಳ ಉಲ್ಲಂಘನೆಯ ಕಾರಣಕ್ಕೆ ಚೀನಾದ ಜೊತೆ ರಾಜತಾಂತ್ರಿಕ ಸಂಬಂಧ ಕಡಿದುಕೊಳ್ಳಲು ಬಯಸಿರುವುದಾಗಿ ಅವರು ಹೇಳಿದರು.
ಫೆಬ್ರವರಿಯಲ್ಲಿ ಚೀನಾದಲ್ಲಿ ಚಳಿಗಾಲದ ಆಟೋಟಗಳು ನಡೆಯಲಿದ್ದು ಅದನ್ನು ಬಹಿಷ್ಕರಿಸಲು ಈ ನಾಲ್ಕು ದೇಶಗಳು ಸದ್ಯ ತೀರ್ಮಾನ ತೆಗೆದುಕೊಂಡಿವೆ. ಚೀನಾ ಸರಕಾರವು ಉಯಿಘರ್ ಮುಸ್ಲಿಮರ ವಿರುದ್ಧ ಅಮಾನವೀಯವಾಗಿ ನಡೆದುಕೊಳ್ಳುತ್ತಿದೆ. ಹಾಂಗ್ ಕಾಂಗ್ ನ ಅರೆ ಸ್ವಾಯುತ್ತತೆಯನ್ನು ಕಸಿದುಕೊಳ್ಳುವ ಕಾಯಕದಲ್ಲಿ ತೊಡಗಿದೆ.
ಈ ಎಲ್ಲ ಹಿಂಸಾಚಾರಗಳಲ್ಲಿ ಚೀನಾದ ಅಮಾನವೀಯತೆ ಮೇರೆ ಮೀರಿದೆ ಎಂದು ಟ್ರೂಡೋ ಹೇಳಿದ್ದಾರೆ.
2018ರಲ್ಲಿ ಚೀನಾದ ಇಬ್ಬರು ಹೂವೈ ಟೆಕ್ನಾಲಜೀಸ್ ನವರನ್ನು ಗೂಢಚಾರಿಕೆ ಆರೋಪದ ಮೇಲೆ ಕೆನಡಾ ಬಂಧಿಸಿದ್ದಾಗಿನಿಂದ ಈ ಎರಡು ದೇಶಗಳ ನಡುವಣ ಸಂಬಂಧ ಹಳಸಿದೆ. ಚೀನಾ ಸಹ ಕೆನಡಾದವರನ್ನು ಬಂಧಿಸಿ ಸೇಡು ತೀರಿಸಿಕೊಂಡಿತ್ತು. ಕೆನಡಾದ ವಿದೇಶಾಂಗ ಮಂತ್ರಿ ಮೆಲಾನಿ ಜೋಲಿ ಅವರು ಸಹ ಬೇರೆ ದೇಶಗಳೂ ಇದೇ ಬಗೆಯ ಕ್ರಮ ತೆಗೆದುಕೊಳ್ಳುವಂತೆ ಕರೆ ನೀಡಿದ್ದಾರೆ.
