ನವದೆಹಲಿ: ಕಚ್ಚಾ ವಸ್ತುಗಳ ನಿರ್ವಹಣಾ ವೆಚ್ಚ ದುಬಾರಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಈ ತಿಂಗಳಿನಿಂದ ಎಲ್ಲಾ ಮಾದರಿಯ ಕಾರುಗಳ ಬೆಲೆಗಳನ್ನು ಹೆಚ್ಚಿಸುವುದಾಗಿ ದೇಶದ ಅತಿದೊಡ್ಡ ಕಾರು ತಯಾರಕ ಕಂಪೆನಿಯಾದ ಮಾರುತಿ ಸುಝುಕಿ ಇಂಡಿಯಾ (ಎಂ.ಎಸ್.ಐ) ಬುಧವಾರ ತಿಳಿಸಿದೆ.
ಕಳೆದ ವರ್ಷ ವಿವಿಧ ಆಯಾಮಗಳಲ್ಲಿ ಕಚ್ಚಾ ವಸ್ತುಗಳ ನಿರ್ವಹಣಾ ವೆಚ್ಚಗಳ ಹೆಚ್ಚಳದಿಂದಾಗಿ ಕಂಪೆನಿಯ ವಾಹನಗಳ ಬೆಲೆ ಪ್ರತಿಕೂಲ ಪರಿಣಾಮ ಬೀರುತ್ತಿದೆ ಎಂದು ಸಂಸ್ಥೆ ತಿಳಿಸಿದೆ.
ಆದ್ದರಿಂದ ವಾಹನದ ಬೆಲೆಯೇರಿಕೆಯ ಮೂಲಕ ಗ್ರಾಹಕರಿಗೆ ಈ ಮೇಲಿನ ಹೆಚ್ಚುವರಿ ವೆಚ್ಚದ ಕೆಲವು ಪರಿಣಾಮವನ್ನು ಅವರಿಗೆ ವರ್ಗಾಯಿಸುವುದು ಕಂಪೆನಿಗೆ ಅನಿವಾರ್ಯವಾಗಿದೆ ಎಂಬುದು ಸಂಸ್ಥೆಯ ಅಭಿಪ್ರಾಯ. ಕಂಪೆನಿಯು ಏಪ್ರಿಲ್ ನಲ್ಲಿ ಬೆಲೆಗಳನ್ನು ಹೆಚ್ಚಿಸಲು ಯೋಜನೆ ಹಾಕಿದೆ ಎಂದು ತಿಳಿಸಿದೆ.
ಅದಾಗ್ಯೂ ಬೆಲೆಯೇರಿಕೆಯ ಪ್ರಮಾಣವನ್ನು ಕಂಪೆನಿ ಇನ್ನೂ ಬಹಿರಂಗಪಡಿಸಿಲ್ಲ. ಕಚ್ಚಾ ವಸ್ತುಗಳ ವೆಚ್ಚಗಳಲ್ಲಿನ ನಿರಂತರ ಹೆಚ್ಚಳದಿಂದಾಗಿ MSI ಸಂಸ್ಥೆ ಈಗಾಗಲೇ ತನ್ನ ವಾಹನದ ಬೆಲೆಯನ್ನು 2021 ರ ಜನವರಿಯಿಂದ ಮಾರ್ಚ್ 2022 ರವರೆಗೆ ಸುಮಾರು 8.8 ಶೇಕಡಾ ಹೆಚ್ಚಿಸಿದೆ.
ಸದ್ಯ ಸುಝುಕಿ ಕಂಪೆನಿಯು ದೇಶಿಯ ಮಾರುಕಟ್ಟೆಯಲ್ಲಿ ಆಲ್ಟೋದಿಂದ ಪ್ರಾರಂಭಿಸಿ ಎಸ್ – ಕ್ರಾಸ್ ವರೆಗೆ ಹಲವಾರು ಮಾದರಿಗಳನ್ನು ಮಾರಾಟ ಮಾಡುತ್ತಿದೆ.
