ಪೋರ್ಚುಗಲ್‌ ತಂಡದ ನಾಯಕ, ಐದು ಬಾರಿ ಬ್ಯಾಲನ್ ಡಿ’ಓರ್ ವಿಜೇತ ಕ್ರಿಸ್ಟಿಯಾನೊ ರೊನಾಲ್ಡೊಗೆ, ಗೆಳತಿ ಜಾರ್ಜಿನಾ ರೋಡ್ರಿಗಸ್, ಹೊಚ್ಚಹೊಸ ರೋಲ್ಸ್ ರಾಯ್ಸ್ ಡಾನ್ ಕಾರನ್ನು ಕ್ರಿಸ್ಮಸ್‌ ಉಡುಗೊರೆಯಾಗಿ ನೀಡಿದ್ದಾರೆ.
ರೊನಾಲ್ಡೊ ಮತ್ತು ಮಕ್ಕಳ ಜೊತೆ ಪೋರ್ಚುಗಲ್‌’ನ ಮನೆಯಲ್ಲಿ ಕ್ರಿಸ್ಮಸ್‌ ಆಚರಿಸಿದ ವಿಡಿಯೋವನ್ನು ರೊಡ್ರಿಗಸ್ ತನ್ನ ಇನ್‌’ಸ್ಟಾಗ್ರಾಮ್ ಖಾತೆಯಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಸಂಗಾತಿ ರೊನಾಲ್ಡೊಗೆ 7 ಕೋಟಿ ಬೆಲೆಬಾಳುವ ಐಷಾರಾಮಿ ರೋಲ್ಸ್ ರಾಯ್ಸ್ ಡಾನ್ ಕಾರು ಮತ್ತು ಮಕ್ಕಳಿಗೆ ಬೈಸಿಕಲ್‌’ಗಳನ್ನು, ರೊಡ್ರಿಗಸ್ ಕ್ರಿಸ್ಮಸ್‌ ಗಿಫ್ಟ್‌ ನೀಡಿದ್ದಾರೆ. ಉಡುಗೊರೆಯಾಗಿ ದೊರೆತ ಕಾರಿನಲ್ಲಿ ದಿಗ್ಗಜ ಪುಟ್‌’ಬಾಲ್‌ ಆಟಗಾರ ಕುಟುಂಬ ಸಮೇತವಾಗಿ ತುಸುದೂರ ಸಂಚರಿಸಿದ್ದಾರೆ.
28 ವರ್ಷದ ಸ್ಪ್ಯಾನಿಷ್ ಮಾಡೆಲ್ ಜಾರ್ಜಿನಾ, ಈ ವರ್ಷದ ಆರಂಭದಲ್ಲಿ ರೊನಾಲ್ಡೊ ಹುಟ್ಟುಹಬ್ಬಕ್ಕೆ ಕ್ಯಾಡಿಲಾಕ್ ಎಸ್ಕಲೇಡ್ ಕಾರನ್ನು ಉಡುಗೊರೆಯಾಗಿ ನೀಡಿದ್ದರು. 37 ವರ್ಷದ ರೊನಾಲ್ಡೊ, ರೋಲ್ಸ್ ರಾಯ್ಸ್ ಕಲಿನನ್ ಎಸ್‌’ಯುವಿ ಫ್ಯಾಂಟಮ್ ಡ್ರಾಪ್‌’ಹೆಡ್ ಸೇರಿದಂತೆ ತಮ್ಮ ಗ್ಯಾರೇಜ್‌’ನಲ್ಲಿ ಐಷಾರಾಮಿ ಕಾರುಗಳ ದೊಡ್ಡ ಸಂಗ್ರಹವನ್ನು ಹೊಂದಿದ್ದಾರೆ.
ಶಕ್ತಿಯುತ ರೋಲ್ಸ್ ರಾಯ್ಸ್ ಡಾನ್, 4 ಆಸನಗಳನ್ನು ಒಳಗೊಂಡಿದ್ದು, 6.6-ಲೀಟರ್ ಟ್ವಿನ್-ಟರ್ಬೊ ವಿ12 ಎಂಜಿನ್‌ ಹೊಂದಿದೆ. 563 ಬಿಎಚ್‌’ಪಿ ಮತ್ತು 820 ಎನ್‌’ಎಮ್‌ ಅತಿಹೆಚ್ಚು ಟಾರ್ಕ್ ಅನ್ನು ಹೊರಹಾಕುತ್ತದೆ. ಕೇವಲ 4.9 ಸೆಕೆಂಡ್‌’ಗಳಲ್ಲಿ, ಗಂಟೆಗೆ 0 ಯಿಂದ100 ಕಿಮೀ ವೇಗ ಪಡೆಯಬಲ್ಲುದು. ಗಂಟೆಗೆ 250 ಕಿಮೀ ಗರಿಷ್ಠ ವೇಗಮಿತಿಯಾಗಿದೆ.
