ಲಕ್ನೋ: ಅಂತಿಮ ಓವರ್‌ವರೆಗೂ ಸಂಜು ಸ್ಯಾಮ್ಸನ್‌ ನಡೆಸಿದ ಏಕಾಂಗಿ ಹೋರಾಟದ ಹೊರತಾಗಿಯೂ, ದಕ್ಷಿಣ ಅಫ್ರಿಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ 9 ರನ್‌ಗಳ ಅಂತರದಲ್ಲಿ ರೋಚಕ ಸೋಲು ಅನುಭವಿಸಿದೆ.
ಪ್ರವಾಸಿ ಪಡೆ, ನೀಡಿದ್ದ 250 ರನ್ ಗಳನ್ನು ಬೆನ್ನಟ್ಟುವ ವೇಳೆ, ಅಂತಿಮ 2 ಓವರ್‌ಗಳಲ್ಲಿ ಟೀಮ್‌ ಇಂಡಿಯಾ ಗೆಲುವಿಗೆ 38 ರನ್‌ಗಳ ಅಗತ್ಯವಿತ್ತು. ಆದರೆ 39ನೇ ಓವರ್‌ನಲ್ಲಿ ಸಂಜು ಸ್ಯಾಮ್ಸನ್‌ರನ್ನು ನಾನ್‌ ಸ್ಟ್ರೈಕ್‌ನಲ್ಲೇ ಉಳಿಸುವಲ್ಲಿ ಯಶಸ್ವಿಯಾದ ರಬಾಡ, ಕೇವಲ 7 ರನ್ ನೀಡಿ ಓವರ್‌ ಮುಗಿಸಿದರು. ಹೀಗಾಗಿ ಅಂತಿಮ ಓವರ್‌ನಲ್ಲಿ 31 ರನ್‌ಗಳ ಕಠಿಣ ಗುರಿ ಭಾರತದ ಮುಂದಿತ್ತು.
ಸ್ಪಿನ್ನರ್‌ ತಬ್ರೇಜ್‌ ಶಂಶಿ ಎಸೆದ ಅಂತಿಮ ಓವರ್‌ನಲ್ಲಿ ಸಂಜು, 3 ಬೌಂಡರಿ ಮತ್ತು 1 ಸಿಕ್ಸರ್‌ ಸಿಡಿಸಿದರಾದರೂ ಗೆಲುವಿನ ಗುರಿ ಮುಟ್ಟಲಾಗಲಿಲ್ಲ. ಅಂತಿಮವಾಗಿ ನಿಗದಿತ 40 ಓವರ್‌ಗಳಲ್ಲಿ 8 ವಿಕೆಟ್‌ ನಷ್ಟದಲ್ಲಿ 240 ರನ್ ಗಳಿಸಲಷ್ಟೇ ಶಕ್ತವಾಯಿತು. 63 ಎಸೆತಗಳನ್ನು ಎದುರಿಸಿದ ಸಂಜು, 9 ಬೌಂಡರಿ ಮತ್ತು 3 ಸಿಕ್ಸರ್‌ಗಳ ನೆರವಿನಿಂದ 86 ರನ್‌ಗಳಿಸಿ ಅಜೇಯರಾಗುಳಿದರು. ಶ್ರೇಯಸ್‌ ಅಯ್ಯರ್‌ 50 ರನ್‌ಗಳಿಸಿದ್ದ ವೇಳೆ ಎನ್‌ಗಿಡಿ ಬೌಲಿಂಗ್‌ನಲ್ಲಿ ರಬಡಾಗೆ ಕ್ಯಾಚಿತ್ತು ನಿರ್ಗಮಿಸಿದರು.
ಲಕ್ನೋದ ಭಾರತರತ್ನ ಶ್ರೀಅಟಲ್ ಬಿಹಾರಿ ವಾಜಪೇಯಿ ಎಕಾನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯಕ್ಕೆ ಆರಂಭದಲ್ಲೇ ಮಳೆ ಅಡ್ಡಿಪಡಿಸಿತ್ತು. ಹೀಗಾಗಿ ಓವರ್‌ಗಳ ಸಂಖ್ಯೆಯನ್ನು 50ರ ಬದಲು 40ಕ್ಕೆ ಇಳಿಸಲಾಗಿತ್ತು. ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ್ದ ಪ್ರವಾಸಿ ಪಡೆ, 4 ವಿಕೆಟ್‌ ನಷ್ಟದಲ್ಲಿ 249 ರನ್ ಗಳಿಸಿತ್ತು.
