‘‘ನಮಗೆ ಬೇಕಾಗಿರುವುದು ಅಸಹಿಷ್ಣುವಲ್ಲ, ಸಹಿಷ್ಣು ಇಂಡಿಯಾ’’

0
56

ನಿರ್ಭೀತಿಯಿಂದ ಜೀವಿಸಿ -ಘನತೆಯಿಂದ ಜೀವಿಸಿ ಅಭಿಯಾನದ ಅಂಗವಾಗಿ ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ ಹೊಸದಿಲ್ಲಿಯ ಇಂದಿರಾಗಾಂಧಿ ಸ್ಟೇಡಿಯಂನಲ್ಲಿ ಆಯೋಜಿಸಿದ್ದ ಜನರ ಹಕ್ಕುಗಳ ಸಮಾವೇಶದಲ್ಲಿ ಪಾಪ್ಯುಲರ್ ಫ್ರಂಟ್ ಚೆಯರ್ಮೇನ್ ಇ.ಅಬೂಬಕರ್  ಅವರು ಮಾಡಿದ ಭಾಷಣವನ್ನು ಓದುಗರಿಗಾಗಿ ಇಲ್ಲಿ ನೀಡುತ್ತಿದ್ದೇವೆ.

ಇಂದು ಮತ್ತೊಮ್ಮೆ ನಾವು ದಿಲ್ಲಿಯಲ್ಲಿ ಒಟ್ಟು ಸೇರಿದ್ದೇವೆ. ನಮಗೆ ಪ್ರಭುತ್ವ, ಮಾಧ್ಯಮ ವಿಶೇಷವಾಗಿ ಜನರೊಂದಿಗೆ ಕೆಲವೊಂದು ಮಾತುಗಳನ್ನು ಹೇಳಲಿಕ್ಕಿದೆ. ನಮ್ಮ ದೇಶ ಎತ್ತ ಸಾಗುತ್ತಿದೆ? ವರುಷಗಳಿಂದ ನಾವು ಕಾಪಾಡಿಕೊಂಡು ಬಂದಿರುವ ಸಂಸ್ಕೃತಿ ಮತ್ತು ಮೌಲ್ಯಗಳನ್ನು ನಾಶಪಡಿಸಲಾಗುತ್ತಿದೆ. ಓರ್ವ ವ್ಯಕ್ತಿಗೆ ಎಲ್ಲಿ ಬೇಕಾದರೂ ಯಾವುದೇ ಸಮಯದಲ್ಲೂ, ಏನು ಬೇಕಾದರೂ  ನಡೆಯಬಹುದೆಂಬಂತಹ ವಾತಾವರಣ ಇದೀಗ ಸೃಷ್ಟಿಯಾಗಿದೆ. ಎಲ್ಲರನ್ನೊಳಗೊಂಡ ಇಂಡಿಯಾ ಎಂಬುದು ದೇಶದ ಜನರ ಕಲ್ಪನೆಯಾಗಿತ್ತು. ಆದರೆ ಇಂದು ಇಡೀ ದೇಶದಲ್ಲಿ ದ್ವೇಷದ ವಾತಾವರಣವಿದೆ. ದಲಿತರು-ಸವರ್ಣೀಯರು, ಹಿಂದು-ಮುಸ್ಲಿಮರು ಮತ್ತು ಇತರ ಸಮುದಾಯಗಳ ನಡುವೆ ದ್ವೇಷ ಸೃಷ್ಟಿಯಾಗಿದೆ. ಹಿಂದುತ್ವವಾದಿಗಳು ಈ ರೀತಿ ಎಲ್ಲ ಕಡೆಗಳಲ್ಲೂ ಜನರನ್ನು ಪರಸ್ಪರ ಎತ್ತಿಕಟ್ಟಿ ಪ್ರತ್ಯೇಕಿಸುವ ಕಾರ್ಯವನ್ನು ಮಾಡುತ್ತಿದ್ದಾರೆ.

ನಮ್ಮ ಆರ್ಥಿಕ ವ್ಯವಸ್ಥೆಯು ಹದಗೆಟ್ಟು ಹೋಗಿದೆ. ಸಣ್ಣ-ದೊಡ್ಡ ಬಹುತೇಕ ಉದ್ಯಮಗಳು ನಷ್ಟವಾಗಿವೆ. ವಾಹನೋದ್ಯಮವು ಸಂಕಷ್ಟಕ್ಕೆ ಸಿಲುಕಿದೆ. ಹೇಗೆ ಕಾರು ಮಾರಾಟವಾಗುತ್ತಿಲ್ಲವೋ ಅದೇ ರೀತಿ  5 ರೂಪಾಯಿಯ ಬಿಸ್ಕತ್ತು ಕೂಡ ಮಾರಾಟವಾಗುತ್ತಿಲ್ಲ. ಬಿಸ್ಕೆಟ್ ಕಂಪೆನಿಗಳೇ ಸ್ವತಃ ಈ ಮಾತನ್ನು ಹೇಳುತ್ತಿವೆ. ನಾನು ನಿಮಗೆ ಆರ್ಥಿಕತೆಯ ಕುರಿತು ದೊಡ್ಡದೊಡ್ಡ ಮಾತುಗಳನ್ನು ಹೇಳುತ್ತಿಲ್ಲ. ಆದರೂ ಬ್ಯಾಂಕುಗಳಿಂದ ಕೋಟ್ಯಂತರ ರೂಪಾಯಿ ಸಾಲ ಪಡೆದು ಪರಾರಿಯಾಗುತ್ತಿರುವ ಮೋದಿಗಳ ಬಗ್ಗೆ ನೆನಪಿಸುವುದು ಅತ್ಯಗತ್ಯವಾಗಿದೆ. ಇದೀಗ ಬ್ಯಾಂಕಿನಲ್ಲಿದ್ದ ಮೀಸಲು ಹಣವನ್ನು ಕೂಡ ಪ್ರಭುತ್ವವು ಲೂಟಿ ಮಾಡಿದೆ. ಈ ಎಲ್ಲಾ ಕೆಲಸವನ್ನು ಪ್ರಭುತ್ವವು ದೇಶಭಕ್ತಿ ಮತ್ತು ರಾಷ್ಟ್ರೀಯ ಭದ್ರತೆಯ ಸೋಗಿನಲ್ಲಿ  ನಡೆಸುತ್ತಿದೆ. ಎಲ್ಲಾ ಮಾತುಗಳು ಬುದ್ಧಿವಂತಿಕೆಯಿಂದ, ರಾಷ್ಟ್ರವಾದ ಮತ್ತು ದೇಶಭಕ್ತಿಯಿಂದ ತುಂಬಿಹೋಗಿವೆ. ದೊಡ್ಡದೊಡ್ಡ ಘೋಷಣೆಗಳನ್ನು ನೀವು ಕೇಳುತ್ತಿರಬಹುದು.

ಮೊದಲು ಕಾಂಗ್ರೆಸ್ ಮುಕ್ತ ಭಾರತ ಎಂದು ಹೇಳಲಾಗುತ್ತಿತ್ತು. ಇದೀಗ ಈ ಘೋಷಣೆಯನ್ನು ‘ಒಂದು ದೇಶ – ಒಂದು ಪಕ್ಷ’ ಎಂದು ಬದಲಿಸಲಾಗಿದೆ. ಇದು ಮುಂದುವರಿದು ‘ಒಂದು ದೇಶ – ಒಂದು ಶಾ’ ಎಂದಾಗಬಹುದು. ಇದು ಬಹುಬೇಗನೆ ಆಗಲಿದೆ. ನಿಮಗೆ ಇನ್ನಷ್ಟು ಕಾಯುವ ಅಗತ್ಯ ಬೀಳದಿರಬಹುದು. ಆ ವೇಳೆ ಹಿಂದು-ಮುಸ್ಲಿಮ್, ಕಾಂಗ್ರೆಸ್-ಬಿಜೆಪಿಯ ನಡುವೆ ಕಾದಾಟ ನಡೆಯಲಾರದು. ಬದಲಿಗೆ ಮೋದಿ ಮತ್ತು ಶಾ ನಡುವೆ ನಡೆಯಬಹುದು. ಆ ಸಂದರ್ಭದಲ್ಲಿ ಆರೆಸ್ಸೆಸ್‌ನ ಪಾತ್ರವಿರಲಾರದು. ಯಾಕೆಂದರೆ, ಆಗ ಶಾ ಓರ್ವ ಶಹನ್‌ಶಾ(ಚಕ್ರವರ್ತಿ)ಯಾಗಿ ಮಾರ್ಪಡಬಹುದು. ಇದೀಗ ‘ಒಂದು ದೇಶ – ಒಂದು ಭಾಷೆ’ ಎಂಬ ಮತ್ತೊಂದು ಘೋಷಣೆ ಹೊರಬಿದ್ದಿದೆ. ಇದು ಹಳೆಯ ಘೋಷಣೆಯಾದ ‘ಹಿಂದಿ-ಹಿಂದು-ಹಿಂದುಸ್ತಾನ್’ನ ಮತ್ತೊಂದು ಆವೃತ್ತಿಯಾಗಿದೆ. ಅಂದರೆ ಒಂದು ದೇಶದಲ್ಲಿ ಒಂದು ಭಾಷೆ ಸಾಕು ಎಂದಾಗಿದೆ. ಆದರೆ ಇದರ ಹಿಂದಿನ ನೈಜ ಉದ್ದೇಶ ಸಮುದಾಯವೊಂದರ ಸಂಸ್ಕೃತಿ, ಪರಂಪರೆ, ಅಸ್ಮ್ಮಿತೆಯನ್ನು ಶಾಶ್ವತವಾಗಿ ಅಳಿಸಿ ಹಾಕುವುದಾಗಿದೆ. ಇದು ಭಾಷೆಯ ಹೆಸರಿನಲ್ಲಿ ಪರಂಪರೆಯನ್ನು ನಾಶಗೊಳಿಸುವ ಯೋಜನೆಯಾಗಿದೆ. ಇದೀಗ ಇಡೀ ದೇಶದಲ್ಲಿ ಹಿಂದಿ ಭಾಷೆಯನ್ನು ಹೇರುವ ಪ್ರಯತ್ನ ನಡೆಯುತ್ತಿದೆ. ಪಂಜಾಬಿ ಭಾಷೆಯನ್ನು ಉಪೇಕ್ಷಿಸಿದ್ದರಿಂದ ಏನಾಯಿತೆಂದು ನಮಗೆ ತಿಳಿದಿದೆ. ಇದಕ್ಕಾಗಿ ದೇಶ ಯಾವ ಬೆಲೆ ತೆತ್ತಿತು ಎಂಬುದನ್ನು ನಾವು ಕಂಡೆವು.  ಭಾಷೆಗೆ ಮಹತ್ವ ನೀಡುವ ತಮಿಳುನಾಡಿನಂತಹ ರಾಜ್ಯಗಳಲ್ಲಿ ಹೋರಾಟದ ಸರಣಿ ಪ್ರಾರಂಭವಾಗಿದೆ.

ಒಂದು ದೇಶ – ಒಂದು ಕಾನೂನು ಎಂಬುದು ಮತ್ತೊಂದು ಘೋಷಣೆಯಾಗಿದೆ. ಇದರ ಫಲಿತಾಂಶವನ್ನು ನಾವು ಕಾಶ್ಮೀರದಲ್ಲಿ ಕಾಣಬಹುದಾಗಿದೆ. ಅಲ್ಲಿ ವಿಧಿ 370ನ್ನು ರದ್ದುಪಡಿಸಲಾಯಿತು. ಕಾಶ್ಮೀರಿ ಜನರನ್ನು ವಿಶ್ವಾಸಕ್ಕೆ ಪಡೆದುಕೊಳ್ಳದೆ ಮತ್ತು ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಧಿಕ್ಕರಿಸಿ ಈ ನಿರ್ಧಾರವನ್ನು ಕೈಗೊಳ್ಳಲಾಯಿತು. ಕಾಶ್ಮೀರಿಗರನ್ನು ವಿಶ್ವಾಸಕ್ಕೆ ಪಡೆದುಕೊಂಡು ಅವರನ್ನು ಪ್ರೀತಿಯಿಂದ ಇಂಡಿಯಾದೊಳಗೆ ಸೇರಿಸಬೇಕಾಗಿತ್ತು, ಆದರೆ ಹೀಗಾಗಲಿಲ್ಲ. ದೇಶ ಅಥವಾ ಪ್ರಭುತ್ವವು ಒಂದು ಭರವಸೆಯನ್ನು ನೀಡಿದರೆ ಅದನ್ನು ಈಡೇರಿಸಬೇಕು. ಇದು ಅತ್ಯುತ್ತಮ ಸಮಾಜದ ಸಂಕೇತವಾಗಿದೆ  ಎಂಬುದಾಗಿ ನಾನು ಹೇಳಬಯಸುತ್ತೇನೆ. ಕಾಶ್ಮೀರದ ವಿಚಾರದಲ್ಲಿ ಇದು ಕೂಡ ನಡೆಯಲಿಲ್ಲ. ನಾವು ಗಮನಿಸುವುದಾದರೆ, ದೇಶದ ಇತರ ರಾಜ್ಯಗಳಲ್ಲಿ ವಿಧಿ 370ಯಂತಹ ಕಾನೂನು ಜಾರಿಯಲ್ಲಿದೆ. ಆದರೆ ಅಲ್ಲೆಲ್ಲೂ ‘ಒಂದು ದೇಶ – ಒಂದು ಕಾನೂನು’ ನಡೆಯಲಿಲ್ಲ. ಇದೇ ವಿಚಾರದ ಲಾಭವನ್ನು ಪಾಕಿಸ್ತಾನವು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪಡೆದುಕೊಳ್ಳುತ್ತಿದೆ ಮತ್ತು ನಾವು ಅದಕ್ಕೆ ಈ ಅವಕಾಶವನ್ನು ಒದಗಿಸುತ್ತಿದ್ದೇವೆ. ಪಾಕಿಸ್ತಾನಕ್ಕೆ ಜವಾಬು ನೀಡಲು ನಮಗೆ ತಿಳಿದಿದೆ. ನಮ್ಮ ಸೇನೆಗೆ ಈ ತಾಕತ್ತು ಇದೆ. ಅದು ಇಂಡಿಯಾದ ಮೇಲೆ ದಾಳಿ ನಡೆಸುವ ಪ್ರಯತ್ನ ನಡೆಸುವಾಗಲೆಲ್ಲಾ, ನಮ್ಮ ಮಿಸೈಲ್ ಮತ್ತು ಬೆಂಕಿಯ ಕಿಡಿ ಅದಕ್ಕೆ ಅದ್ಭುತವಾದ ಪ್ರತ್ಯುತ್ತರವನ್ನು ನೀಡುತ್ತಿದೆ. ಅದೆಂದೂ ಮರೆಯಲಾಗದ ಪಾಠವನ್ನು ಸೇನೆಯು ಅದಕ್ಕೆ ಕಲಿಸಿದೆ. ಇದಕ್ಕಾಗಿ ದೇಶದ ಎಲ್ಲಾ ಜನರನ್ನು ವಿಶ್ವಾಸಕ್ಕೆ ಪಡೆದುಕೊಳ್ಳುವುದು ಅತ್ಯಗತ್ಯವಾಗಿದೆ. ಆದರೆ ಕಾಶ್ಮೀರದಲ್ಲಿ ಇದಕ್ಕೆ ತೀರಾ ವ್ಯತಿರಿಕ್ತವಾದ ಸನ್ನಿವೇಶಗಳು ನಡೆಯುತ್ತಿವೆ. ಪ್ರಜಾಪ್ರಭುತ್ವದಲ್ಲಿ ತನ್ನದೇ ಪ್ರಜೆಗಳ ವಿರುದ್ಧ ಸೇನೆಯ ಬಳಕೆ ಹಿಂದೆಂದೂ ಕಂಡಿರಲಿಲ್ಲ. ಕಾಶ್ಮೀರವು ಇದೀಗ ಒಂದು ಸೆರೆಮನೆಯಾಗಿ ಮಾರ್ಪಟ್ಟಿದೆ.

ಬಾಬರಿ ಮಸ್ಜಿದ್ ಪ್ರಕರಣವನ್ನು ಇತ್ಯರ್ಥಗೊಳಿಸುವ ವಿಚಾರಣೆ ಸುಪ್ರೀಂ ಕೋರ್ಟ್‌ನಲ್ಲಿ ನಡೆಯುತ್ತಿದೆ. ವಾಸ್ತವದಲ್ಲಿ ಅದೊಂದು ವಕ್ಫ್(ಅಲ್ಲಾಹನ ಮಾರ್ಗದಲ್ಲಿ ಸಮರ್ಪಿಸಿದ) ಜಮೀನಾಗಿದೆ. ಒಂದು ಮಸ್ಜಿದ್ ಜಾಗವು ಅಲ್ಲಾಹನ ಭೂಮಿಯಾಗಿರುತ್ತದೆ. ಆ ಜಾಗವನ್ನು ಬದಲಿಸುವ ಅಥವಾ ಕೈಬಿಡಬೇಕೆಂಬ ಸಲಹೆ ನೀಡುವ ಅಧಿಕಾರ ಯಾವುದೇ ನಾಯಕ, ಮೌಲಾನಾ ಅಥವಾ ಸಂಘಟನೆ ಸೇರಿದಂತೆ ಯಾರಿಗೂ ಇಲ್ಲ. ಸುಪ್ರೀಂ ಕೋರ್ಟ್‌ನಲ್ಲಿ ಈಗ ನಡೆಯುತ್ತಿರುವ ವಿಚಾರಣೆ ಅದೊಂದು ಆಸ್ತಿಗೆ ಸಂಬಂಧಿಸಿದ ಮೊಕದ್ದಮೆಯಾಗಿದೆ. ನಮಗೆ ನ್ಯಾಯ ದೊರಕಬಹುದೆಂಬ ನಿರೀಕ್ಷೆಯಿದೆ. ಬಾಬರಿ ಮಸ್ಜಿದ್ ಪ್ರಕರಣದ ನ್ಯಾಯದ ಹೋರಾಟವನ್ನು ನಾವು ಮುಂದಿನ ಪೀಳಿಗೆಗೂ ತಲುಪಿಸಲಿದ್ದೇವೆ. ನ್ಯಾಯಕ್ಕಾಗಿ ಎದ್ದುನಿಲ್ಲುವ ಜಾತ್ಯತೀತ ಸಮಾಜದ ಕೈಗೆ ಅಧಿಕಾರ ಬಂದಾಗ, ಆ ವೇಳೆ ಆ ಸರಕಾರವು ಬಾಬರಿ ಮಸ್ಜಿದ್ ಅನ್ನು ಯಥಾ ಜಾಗದಲ್ಲಿ ಪುನರ್ ನಿರ್ಮಿಸಲಿದೆ.

ಅತ್ಮೀಯ ಸಹೋದರರೇ, ಮುಸ್ಲಿಮರನ್ನು ಮತ್ತಷ್ಟು ಬೆದರಿಸಲು ಮತ್ತು ಅವರಲ್ಲಿ ಭೀತಿ ಸೃಷ್ಟಿಸಲು ಎನ್‌ಆರ್‌ಸಿಯನ್ನು ತಂದಿದೆ. ಇಂಡಿಯಾದಲ್ಲಿ ಹೊರ ದೇಶದವರು ಇರಬಹುದು, ಇದನ್ನು ಗುರುತಿಸುವುದು ಅಗತ್ಯವಾಗಿದೆ. ಆದರೆ ಇದರ ಹಿಂದಿನ ಉದ್ದೇಶವು ಯಾವುದೇ ಒಂದು ಸಮುದಾಯವನ್ನು ನಿರ್ನಾಮಗೊಳಿಸುವುದು ಮತ್ತು ಪ್ರತ್ಯೇಕಿಸುವುದು ಆಗಿರಬಾರದು. ಅಸ್ಸಾಮ್ ಎನ್‌ಆರ್‌ಸಿಯ ಪಟ್ಟಿಯಿಂದ 19 ಲಕ್ಷ ಮಂದಿ ಹೊರಗುಳಿದಿದ್ದಾರೆ. ಅದರಲ್ಲಿ ಶೇ.70ರಷ್ಟು ಮಂದಿ ಹಿಂದು ಹಾಗೂ ಇತರ ಸಮುದಾಯವರು ಮತ್ತು ಶೇ.30ರಷ್ಟು ಮಂದಿ ಮುಸ್ಲಿಮರಾಗಿದ್ದಾರೆ. ಮೊದಲು ಎನ್‌ಆರ್‌ಸಿಯನ್ನು ಶ್ಲಾಘಿಸಿದ್ದ ಆರೆಸ್ಸೆಸ್ ಮತ್ತು ಬಿಜೆಪಿಯ ಈ ಬೆಳವಣಿಗೆಯನ್ನು ಗಮನಿಸಿ ಇದಕ್ಕೆ ವಿರೋಧ ವ್ಯಕ್ತಪಡಿಸುತ್ತಿದೆ. ಮುಂದೆ ಅವರು ಕೋರ್ಟಿಗೂ ಹೋಗಬಹುದು. ಮತ್ತೊಂದೆಡೆ, ಹಿಂದುಗಳಿಗೆ ಹೆದರುವ ಅಗತ್ಯವಿಲ್ಲ ಎಂದು ಅಮಿತ್ ಶಾ ಹೇಳುತ್ತಾರೆ. ಹಿಂದುಗಳಿಗೆ ಯಾವುದೇ ಅಪಾಯವಿಲ್ಲ ಎಂದು ಆರೆಸ್ಸೆಸ್ ಮುಖ್ಯಸ್ಥ ಮೋಹನ್ ಭಾಗವತ್ ಹೇಳುತ್ತಿದ್ದಾರೆ. ಇದರ ಜೊತೆಗೆ ಅವರು,  ಇಂಡಿಯಾದಲ್ಲಿರುವ ಪ್ರತಿಯೊಬ್ಬರೂ ಹಿಂದುಗಳಾಗಿದ್ದಾರೆ ಎಂದೂ ಹೇಳುತ್ತಾರೆ. ಇದರ ಕೊನೆಗೆ, ಹಿಂದೂ ಅಲ್ಲದಿದ್ದರೆ ಎಲ್ಲರೂ ಹಿಂದುಗಳಾಗಬೇಕಾಗಿದೆ ಎಂಬ ಮಾತು ಕೂಡ ಸೇರ್ಪಡೆಯಾಗುವ ಸಾಧ್ಯತೆಯಿದೆ. ಎನ್‌ಆರ್‌ಸಿಯ ಉದ್ದೇಶವು ದೇಶದ ಮೂಲ ಪೌರರನ್ನು ಗುರುತಿಸುವುದಲ್ಲ, ಬದಲಿಗೆ ಇದು ವಿಶೇಷ ಸಮುದಾಯ ಅಂದರೆ ಮುಸ್ಲಿಮ್ ಸಮುದಾಯವನ್ನು ಮೂಲೆಗೆಸೆಯುವುದು ಮತ್ತು ಅವರನ್ನು ಭೀತಿಗೊಳಪಡಿಸುವುದಾಗಿದೆ. ವಸ್ತುಸ್ಥಿತಿ ಹೀಗಿರುವಾಗ, ನಾವು ನಿಮ್ಮ ಬೆದರಿಕೆಯನ್ನು ಮತ್ತು ಬೆದರಿಸುವವರನ್ನೂ ನಿರಾಕರಿಸುತ್ತೇವೆ ಎಂದು ಪ್ರಭುತ್ವ, ಮಾಧ್ಯಮ ಮತ್ತು ಜನತೆಯ ಮುಂದೆ ಘೋಷಿಸುತ್ತಿದ್ದೇವೆ. ಅಲ್ಲಾಹನಿಗೆ ಹೊರತಾಗಿ ನಾವು ಯಾರಿಗೂ ಭಯಪಡುವುದಿಲ್ಲ ಹಾಗೂ ಭಯಪಡಲಾರೆವು. ಕಾಂಗ್ರೆಸ್, ಬಿಜೆಪಿ ಯಾವುದೇ ಆಡಳಿತವಾಗಿರಲಿ ತಮ್ಮೊಂದಿಗೆ ತಾರತಮ್ಯ ನಡೆಸುವುದನ್ನು ಜನರು ನಿರೀಕ್ಷಿಸುವುದಿಲ್ಲ. ಆದರೆ ಪ್ರಸಕ್ತ ಪ್ರಭುತ್ವವು ತಮ್ಮೊಂದಿಗೆ ನಡೆಸುತ್ತಿರುವ ತಾರಮತ್ಯವನ್ನೂ ನಾವು ನಿರಾಕರಿಸುತ್ತೇವೆ. ದೇಶದಲ್ಲಿ ಅರಾಜಕತೆಯ ಆಡಳಿತವು ನಡೆಯುತ್ತಿದೆ. ಇದರ ಜೊತೆಗೆ ಗೋ ರಾಜಕೀಯವೂ ನಡೆಯುತ್ತಿದೆ. ಹೇಗೆ ಮನುಷ್ಯರಿಗೆ ಒಂದು ವ್ಯಕ್ತಿತ್ವವಿದೆಯೋ, ಅದೇ ರೀತಿ ಪ್ರಾಣಿಗಳಿಗೂ ಇವೆ. ದನವು ತನ್ನದೇ ಗುಣದೊಂದಿಗೆ ಬದುಕಲು ಬಯಸಿದರೆ ಈ ಮಂದಿ ಅದನ್ನು ಬೇಕಾದಂತೆ ಬದುಕಲು ಬಿಡುತ್ತಿಲ್ಲ. ಬಹುಶಃ ಇದೇ ಕಾರಣಕ್ಕಾಗಿ ಗುಜರಾತ್‌ನಲ್ಲಿ ದಿನವೊಂದು ಬಿಜೆಪಿ ಸಂಸದನೋರ್ವನ ಮೇಲೆ ದಾಳಿ ನಡೆಸಿದ್ದು.

ಸಹೋದರರ – ಸಹೋದರಿಯರೇ, ನಮ್ಮ ದೇಶವು ನಮಗೆ ಅತ್ಯಂತ ಪ್ರಿಯವಾಗಿದೆ. ಇದರ ಮೇಲೆ ಒಂದು ಗೀಚು ಕೂಡ ಬೀಳಬಾರದು. ಧರ್ಮ, ಜಾತಿ, ಭಾಷೆಯ ಆಧಾರದಲ್ಲಿ ಪರಸ್ಪರ ಹೊಡೆದಾಡಿಕೊಳ್ಳುವ ಸನ್ನಿವೇಶ ನಿರ್ಮಾಣವಾಗಬಾರದು. ನಮ್ಮ ಮುಂದೆ ಬಹಳಷ್ಟು ನಿದರ್ಶನಗಳಿವೆ. ನಾವು ಅದಕ್ಕೆ ಮಹತ್ವ ನೀಡಬೇಕಾಗಿದೆ. ನಮ್ಮ ದೇಶದಲ್ಲಿ ಸುಮಾರು ಆರೂವರೆ ಲಕ್ಷ ಹಳ್ಳಿಗಳಿದ್ದು, ಇಲ್ಲಿ ಶಿಕ್ಷಣದ ಕೊರತೆ ಮತ್ತು ಬಡತನವಿದೆ. ದೇಶದ ಜನರ ಬಡತನವನ್ನು ದೂರ ಮಾಡಲು ನಾವು ಒಂದಾಗಿ ಹೋರಾಟವನ್ನು ನಡೆಸಬೇಕಾಗಿದೆ. ನಮಗೆ ಅಸಹಿಷ್ಣು ಇಂಡಿಯಾವಲ್ಲ, ಬದಲಿಗೆ ಸಹಿಷ್ಣು ಇಂಡಿಯಾ ಬೇಕಾಗಿದೆ. ಆರೆಸ್ಸೆಸ್ ಮತ್ತು ಸಂಘಪರಿವಾರವು ಅಸಹಿಷ್ಣು ಭಾರತ ಸೃಷ್ಟಿಸಲು ಪ್ರಯತ್ನಿಸುತ್ತಿವೆ. ಕೇವಲ ನಿರ್ದಿಷ್ಟ ಸಮುದಾಯದ ಅಳು ಮತ್ತು ಕಣ್ಣೀರು ಹರಿಯುವ ಬಯಕೆಯು ಒಳ್ಳೆಯದ್ದಲ್ಲ, ಇದನ್ನು ತೊರೆಯಿರಿ. ನಿರ್ದಿಷ್ಟ ಸಮುದಾಯದ ಮಕ್ಕಳನ್ನು ಕತ್ತರಿಸಿ ಹತ್ಯೆಗೈಯ್ಯುವ  ಉದ್ದೇಶವನ್ನೂ ಬಿಟ್ಟುಬಿಡಿ ಎಂದು ನಾನು ಹೇಳಬಯಸುತ್ತೇನೆ. ಅದೇ ರೀತಿ ನಿರ್ದಿಷ್ಟ ಧರ್ಮದ ಮನೆಯಲ್ಲಿ ಮಾತ್ರ ಸಂತಸದ ವಾತಾವರಣ ಉಂಟಾಗಲಿ ಎಂಬ ಚಿಂತನೆಯೂ ಒಳ್ಳೆಯದಲ್ಲ. ನಮ್ಮ ದೇಶಕ್ಕೆ ಅಮೆರಿಕಾದ ಅಧ್ಯಕ್ಷರು ರಾಷ್ಟ್ರಪಿತನನ್ನು ನಿರ್ಮಿಸಿಕೊಟ್ಟಿದ್ದಾರೆ. ಆದರೆ ಘಂಟಾಘೋಷವಾಗಿ ನಾವು ಹೇಳುವುದೇನೆಂದರೆ, ಈ ದೇಶಕ್ಕೆ ಇರುವುದು ಓರ್ವನೇ ರಾಷ್ಟ್ರಪಿತ. ಅವರೇ ಮಹಾತ್ಮ ಗಾಂಧೀಜಿ. ದಕ್ಷಿಣ ಆಫ್ರಿಕಾದಲ್ಲಿ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಬಿಳಿಯ ಪೊಲೀಸನೊಬ್ಬ ಅವರನ್ನು ಬೂಟುಗಾಲಿನಿಂದ ಒದ್ದಾಗ ಅವರ ಎರಡು ಹಲ್ಲುಗಳು ಉದುರಿ ಬಿದ್ದವು. ಆ ಹಲ್ಲುಗಳಿಗೆ ಪ್ರತಿಯಾಗಿ ನಮಗೆ ಸ್ವಾತಂತ್ರ ದೊರಕಿತು. ಆ ಮಹಾತ್ಮನನ್ನು ಗುಂಡು ಹಾರಿಸಿ ಕೊಂದವರೇ ಇಂದು ಅವರನ್ನು ಕೊಂಡಾಡುತ್ತಿದ್ದಾರೆ. ಆ ಮಹಾತ್ಮ ಓರ್ವ ಗುಜರಾತಿಯಾಗಿದ್ದರು. ಓರ್ವ ಗುಜರಾತಿಯಿಂದ ನಮಗೆ ದೊರಕಿದ ಸ್ವಾತಂತ್ರದ ಮೌಲ್ಯಗಳನ್ನು ಇಬ್ಬರು ಗುಜರಾತಿಗರು ಒಡೆಯುವ ಪ್ರಯತ್ನದಲ್ಲಿದ್ದಾರೆ.

ಸಹೋದರ-ಸಹೋದರಿಯರೇ, ನಮ್ಮ ಹಲ್ಲುಗಳು ಕೂಡ ಉದುರಲು ತಯಾರಿವೆ. ಕಳೆದುಹೋಗಿರುವ ನಮ್ಮ ಸ್ವಾತಂತ್ರವನ್ನು ಮರಳಿಗಳಿಸಲು ನಾವು ನಮ್ಮೆಲ್ಲಾ ಹಲ್ಲುಗಳನ್ನು ತ್ಯಾಗ ಮಾಡಲು ಸಿದ್ಧರಿದ್ದೇವೆ. ಜನರ ಹಕ್ಕುಗಳ ಧ್ವನಿಯನ್ನು ನಾವು ಜೋರಾಗಿ ಮೊಳಗಿಸುತ್ತೇವೆ. ಜನರ ಹಕ್ಕುಗಳಿಗಾಗಿ ನಾವು ಬಲಿದಾನ ನೀಡುತ್ತೇವೆ. ನಾವು ನಿರ್ಭೀತಿಯಿಂದ ಮತ್ತು ಘನತೆಯಿಂದ ಜೀವಿಸಬೇಕಾಗಿದೆ. ನಾವು ಸತ್ಯದ ಕಣ್ಣು ತಪ್ಪಿಸಿ ಪಾರಾಗಬಹುದು. ಆದರೆ ಸತ್ಯವು ನಮ್ಮನ್ನು ಹುಡುಕುತ್ತಾ ಬರುವುದು ಮತ್ತು ಅದು ಖಂಡಿತಾ ನಮ್ಮನ್ನು ಹಿಡಿದಿಡಲಿದೆ. ಅದಕ್ಕೂ ಮೊದಲೇ ನಾವು ಸತ್ಯವನ್ನು ಅರಿತುಕೊಂಡು ಅದನ್ನು ಅಳವಡಿಸಿಕೊಳ್ಳಬೇಕು. ಸರ್ವಾಧಿಕಾರಿಗಳಾರೂ ಹೆಚ್ಚು ಕಾಲ ಬಾಳಲಿಲ್ಲ. ಹಿಂದುತ್ವ ರಾಜಕೀಯ ಮತ್ತು ದ್ವೇಷ ರಾಜಕೀಯದ ಅಂತ್ಯ ಪ್ರಾರಂಭಗೊಂಡಿದೆ. ಇವರ ಸರ್ವಾಧಿಕಾರದ ಮಾದರಿಯು ಹಿಟ್ಲರ್ ಆಗಿದ್ದರೆ, ಇವರ  ಅಂತ್ಯದ ಮಾದರಿಯೂ ಹಿಟ್ಲರೇ ಆಗಿರುವನು. ನಾವು ನಿರೀಕ್ಷೆಯಲ್ಲಿದ್ದೇವೆ ಮತ್ತು ಅವರೂ ನಿರೀಕ್ಷೆಯಲ್ಲಿರಲಿ.

***

LEAVE A REPLY

Please enter your comment!
Please enter your name here