ಗುವಾಹಟಿ: ಧಾರ್ಮಿಕ ಟೋಪಿಯನ್ನು ಧರಿಸಿದ್ದಕ್ಕಾಗಿ ಅಸ್ಸಾಂ ಪೊಲೀಸ್ ರೇಡಿಯೊ ಆರ್ಗನೈಝೇಶನ್ (ಎ.ಪಿ.ಆರ್.ಒ)ನ ಮುಸ್ಲಿಮ್ ಸಬ್ ಇನ್ ಸ್ಪೆಕ್ಟರ್ ಓರ್ವರನ್ನು ಅಮಾನತುಗೊಳಿಸಲಾಗಿದೆ. ಸಮವಸ್ತ್ರ ನಿಯಮದ ಉಲ್ಲಂಘನೆಯ ಆರೋಪದಲ್ಲಿ ಅವರನ್ನು ಅಮಾನತುಗೊಳಿಸಲಾಗಿದೆ ಎನ್ನಲಾಗಿದೆ.

ಅಮಾನತುಗೊಂಡ ಸಬ್ ಇನ್ ಸ್ಪೆಕ್ಟರ್ ರನ್ನು ಮುಹಮ್ಮದ್ ಶೌಕತ್ ಅಲಿ ಎಂದು ಗುರುತಿಸಲಾಗಿದೆ. ಇಸ್ಲಾಮಿನ ನಂಬಿಕೆಗೆ ಸಂಬಂಧಿಸಿದ ಟೋಪಿ ಧರಿಸಿದ ಫೋಟೊ ವೈರಲ್ ಆದ ಬಳಿಕ ಅವರನ್ನು ಅಮಾನತುಗೊಳಿಸಲಾಗಿದೆ.

ಅಮೀನ್ ಗಾಂವ್ ನಲ್ಲಿ ಕರ್ತವ್ಯದಲ್ಲಿದ್ದಾಗ ನಮಾಝ್ ನ ಬಳಿಕ ಟೋಪಿಯನ್ನು ತೆಗೆಯಲು ಮರೆತಿದ್ದ ಶೌಕತ್ ರ ಫೋಟೊವನ್ನು ಸೆರೆಹಿಡಿಯಲಾಗಿತ್ತು ಎಂದು ಎಡಿಜಿಪಿ ಎಸ್.ಎನ್.ಸಿಂಗ್ ಹೇಳಿದ್ದಾರೆ.

ಸಮವಸ್ತ್ರ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದ ಶೌಕತ್ ರನ್ನು ಪ್ರಸ್ತುತ ದಿಸ್ಪುರದಲ್ಲಿರುವ ಸಂದೇಶ ಸಂಯೋಜನಾ ಕೇಂದ್ರಕ್ಕೆ ನಿಯೋಜಿಸಲಾಗಿದೆ.